Shillong, Naitung 08
Ka All Khasi Meghalaya Tourist Taxi Association (AKMTTA) ka la pynb-na ba kan don ka jingpakhang ban ïaid kali sha Assam lashai ka sngi ka 09 tarik u Naitung, 2025.
Kane ka rai jong ka AKMTTA ka long hadien ba ka All Assam And Greater Assam Tourist Taxi Association (ASA-GATTA) kaba na Assam, ka la phah da ka kyrwoh ba kan don ka All India General Strike lane ka Chakka Bandh ba la khot da ka Central Trade Unions and National Federations.
Kumta na ka liang ka AKMTTA, ka la pynbna sha ki paidbah ka Jylla lashai ka sngi kan don ka jingpakhang ban ïaid kali ka ban long 24 kynta, ka ban sdang naduh ka 5 baje mynstep.
Kane ka jingpakhang ïaid kali ka long kum shibynta ka jingkyrshan ïa ki hynñiew tylli ki jingdawa kiba la dawa da ki nongñiah kali kamai ha kylleng ka ri.
Ki mat jingdawa jong ki nongñiah kali kamai ha kylleng ka Ri ki long ban weng noh mar-mar ïa ka Aiñ Motor Vehicle Reform Act 2019 kaba pyrshah ïa ki nongñiah kali kamai. Nangta ruh ban pynsangeh noh ïa ka kyndon “Hit and Run “clause 106(2) jong ka Indian Civil Court (BNS) bad ban pynsangeh noh mar-mar ïa ka jinglum khajna (Toll) lyngba ki Satellite System.
Nalor kata, ki jingdawa ban pynsangeh ïa ka jingpynmih ki aiñ kuna ba palat , ki kuna lyngba ki dur, bad pynsuk ki kyndon kiba ïadei bad ki Pollution Certificate bad kiwei kiwei ki jingdonkam kiba ym donkam shuh, ban ai jaka shongthait, umbam-umdih kaba khuid, dukan ja ba tad, paiñkhana ha man la ka 60 km ha ki surok bah jong ka Ri na ka bynta ki nongtrei kali, ban khang ki kali shimet ban kit nongleit jingleit ha jaka khaïi-pateng ba la ‘register’ bad ruh ban ïada ïa ki hok jong ki nongtrei kali motor bad pynsangeh ïa ka jingpynshitom bad jingpyndonkam bakla ïa ki kyndon aiñ pyrshah ïa ki.
Ha ka kyrwoh na ka AKMTTA, ka la ong “Ngi la ïoh jingtip na ki paralok jong ngi ha Assam shaphang ka jingpynjari tyngeh ïa ka General Strike (Chakka Bandh). Namar kata ban ïada ïa ki nongleit jingleit bad ki nongñiah kali na kano-kano ka jingshem lanot ha lynti, baroh ki Seng Tourist Taxi jong ka Meghalaya ki la rai ban ym pynïaid ïa ki jingshakri taxi sha Assam lashai ka sngi”.
