Shillong, Naitung 08
Ka Meghalaya Human Rights Commission (M-HRC) ka la kyrpad ïa u Superintendent of Police (SP) jong ka East Khasi Hills District, Bah Vivek Syiem ban ai ïa ka kaiphod halor ka jingky-nnoh ka kmie jong u Gedwin Jyrwa, 19 snem ka rta ba ki pulit ka thanat Sohra ki la bom bad tied ïa u khun jong ka haduh ba un da mynsaw jur.
Kum ban shu pyn-kynmaw, ha ka jingujor ba la ai da ka kmie u Getwin, ka Kong Mild-red Jyrwa, ka la kdew ba ka la leit ban aiti ïa u Gedwin sha ka thanat ha ka 3 tarik u Naitung ha ka por 9 baje mynstep hadien ba ka la ïoh jingtip ba ki Pulit ki la thwet bad wad ïa u khun jong ka namar ka jingïohpdiang jong ki Pulit ïa ka jingujor na uwei u briew uba la ïadon bynta ha ka huri-hura kaba malu-mala bad u samla Gedwin ha ka 28 tarik u bnai Jylliew, 2025.
Hynrei, ha ka por ba ka kmie jong u samla Getwin ka la leit ban shaw biang ïa u ha kata kajuh ka sngi kata ha ka 3 tarik Naitung, ka la shem pynban ba u khun jong ka, u la shah pynmynsaw jur da kaba shah bom bad tied ha ki Pulit.
Na ka daw ka jingshah pynmynsaw jur, na ka liang ka kmie jong une u samla ka la rah noh ïa u sha Sohra Community Health Centre bad kaba la phah pat ïa u sha Shillong Civil Hospital na ka bynta ka jingai jingsumar kaba bniah.
U samla Gedwin u la shong ha ka jaka sumar naduh ka 3 tarik u Naitung ha Shillong Civil Hospital bad la pyllait noh ïa u ha ka Sngi Nyngkong jong ka 7 tarik Naitung, 2025.
U Chairman ka MHRC, Justice Rtd. T Vaiphei, ha ka Sngi Ba-ar jong ka 8 tarik Naitung, 2025, u la pyntip sha ki lad pathai khubor ba ka Commission ka la ïohpdiang ïa ka jingujor ha ka Sngi Nyngkong bad ba ki la shimkhia mardor halor kane ka jingjia.
U la ong ruh ba ki khmih lynti ban ïoh pdiang ïa ka kaiphod na u SP shuwa ka 31 tarik u Naitung.
U Justice Vaiphei u la ong ba ha ka jingïoh ïa ka kaiphod, yn sa ïaid shakhmat ïa ki kam kiba dei.
“Hadien ba ngi la khmih ïa ka jingujor, ngi don ha ka jingmut bad ka jingpyrkhat ba ki la don katto-katne ki jingpynkheiñ ïa ka hok longbriew-manbriew jong u Getwin Jyrwa kiba paw bad pynmih ba dei ban tohkit da ka Commission. Hynrei shwa ban pynlong ïa kum kane ka jingtohkit, ngi shim ba ka long kaba donkam ban pan ïa ka kaiphod halor kane na u Superintendent of Police ka East Khasi Hills District,” ong u Chairperson ka Commission.
Ha ka Sngi Nyngkong, ki pulit ka East Khasi Hills ki la sdang ïa ka jingtohkit hapoh ka jingpeit jong u Sub-Divisional Police Officer (SDPO) ka Pynursla bad ïa ka kaiphod yn sa phah hapoh kane ka taïew.
Ka kmie jong u Gedwin, Kong Mildred Jyrwa ka la ujor da ka ejahar bad ai ruh ïa ki jingshisha sha ka MHRC, ha kaba ka la kam ba ki Pulit jong ka thanat Sohra ki la pynmynsaw jur ïa u khun jong ka.
