Shillong, Naitung 08
Ka All Meghalaya Pri-mary School Teachers’ Association (AMPSTA) ka la pynpaw ïa ka jingpyrshah jur ïa kano-kano ka jingthmu ban pynduh noh ïa ki kam nonghikai Deficit bala dep mang (Deficit Sanctioned Posts). Ïa kane ka jingpyrshah ka AMPSTA ka la pynpaw lyngba ka dorkhas ba la aiti sha u Myntri ka tnat pule puthi u Rakkam A Sangma ha ka 7 tarik mynta u bnai.
Ka AMPSTA ba la ïalam da u General Secretary, Bah FC Shullai ka la pynpaw ïa ka jingsngewkhia halor ka Meghalaya Education Grant (MEG) bad ki mat kiba ktah ïa ki nonghikai.
“Ha ka jaka ban pynduh noh ïa kine ki kam, ngi kyntu ïa ka Sorkar ba kan pynneh bad pyndap ïa ki kam kum ki nonghikai Deficit,” ong u Bah Shullai bad bynrap ba ka Association ka la pynpaw ruh ïa ka jingsngewkhia ha kaba ïadei bad ka jingpynbteng ïa ki kam nonghikai Deficit ba bat da ki nonghikai Deficit ba mynta ba kin ym shah ktah hynrei hadien ba la shongthait pat, yn pynkylla noh hapoh ka MEG.
U la pyntip ba u Myntri ka tnat pule puthi u la pynshai ba lada ki Management Committee ki skul ki aiti lut ïa ki jingdon jingem sha ka Sorkar, ïa ki kam ba la mang yn pynkylla noh sha ki kam Sorkar bad ki nonghikai kin long ki nongtrei Sorkar. Hynrei lada ki nongpynïaid kim aiti lut ïa ki jingdon jingem, ki nonghikai kiba la don lypa kin dang ïoh tulop kum ki Deficit hynrei hadien ba ki la shongthait ïa katei ka kam yn sa pynkylla noh hapoh ka MEG.
“Kane ka la buh jingeh shibun ïa ka Association ha kaba ngi kyntu jur ïa ka Sorkar ban pynmih ïa ki jingbthah kiba shai bad pynthikna ïa ka jingshngaiñ ka kam bad ka jingbteng jong ka jingshakri na ka bynta baroh ki nonghikai Deficit kiba mynta bad kiba hadien,” u la ong.
U Bah Shullai u la pynpaw ruh haba pdiang bad sngewnguh ïa ka jingthmu jong ka Sorkar ban pynbha ïa ka rukom hikai, ka Association ka pyrshah jur ruh ïa ki kyndon kiba duna ka jingpynshai, ka jinglong hok bad ka jingkitkhlieh.
Shuh shuh u la pynpaw ïa ki katto-katne ki jingeh ba kongsan jong ka Association kiba kynthup ïa ki kyndon ne ki jingbthah ki bym shai na ka bynta ka jingpynbha katkum ka jingtreikam ki lah ban pynmih ïa ka jingbym ïaryngkat na ka bynta ki skul kiba duna ka jingdon jingem, ka jingaibor ba pura sha ki SMC ne ki GB khlem ka jingpeit bniah bad ka jingkitkhlieh ka lah ban wanrah ïa ka jingpyndonkam bakla ïa ka bor, ka jingpynslem ban pyndap ïa ki kam ba thylli jong ki nonghikai, ka jingslem ban thung nonghikai ha ki sobjek ki ktien Garo bad Khasi, ka jingbym shai ha ka Contributed Provident Fund (CPF) ba la thep ha ka State Bank of India Laitumkhrah Branch bad ki hukum ba pynmih ka Sorkar khlem ka jingïasyllok.
“Da kaba shim ïa kine ki jingeh, ngi kyntu ïa ka Sorkar ban ai ïa ki kyndon kiba shai bad kiba batai bniah ïa ki kyndon na ka bynta ka jingai pisa katkum ka jingtreikam, ban pynbha ïa ki lad jingkitkhlieh ban pynbeit ïa ka bor jong ki SMC ne ki GB bad ban ïada na ka jingpyndonkam bakla ïa ki bor, ban pynthikna ïa ki lad jingïada ban ïada ïa ki hok bad ka jingshngaiñ kam jong ki nonghikai Deficat,” u la ong.
Nalor kane, ka AMPSTA ka la ïakren ruh halor ka jingïateh kular hapdeng ka tnat pule puthi bad ka Mother’s Union, Tura ha kaba ki la pynpaw ïa ka jingsngewkhia bad jingbym ïahap jingmut kaba jur ha kaba u Myntri ka tnat pule puthi u la pyntip ba ka Sorkar ka la shimkhia ïa kane ka kam bad kan ap ïa ka rai jong u Myntri Rangbah ha shwa ban ïaid shakhmat.
Ka la kyntu ïa ka Sorkar ba kam dei ban leh klet ïa ki jingshisha kiba don ha ki skul bad hapdeng ki nonghikai. “Ki polisi ba la shna khlem da iamir jingmut naduh tynrai kin wanrah tang ïa ki jingeh kiba kham jur,” kala ong.
“Ngim pyrshah ïa ki jingpynkylla, watla katta dei ban ïamir jingmut bha bad dei ban ïada ïa ka hok jong ki nonghikai. Ngi kyrmen ba ka Sorkar kan pynbeit kloi ïa ki jingeh jong ngi ban lait na kano kano ka jingeh bad ka dei bad ban pynthikna ïa ka rukom hikai kaba hok, kaba shai ha ka rukom hikai baroh kawei,” u la ong.
