Shillong, Naitung 08
Ka Mawkasiang SC, Lapalang SC bad ka Mawphlang SC ki la jam sha ka pre-quarter final ha ka lympung ïalehkai 4th Division Under- 20 Football League 2025 ba la pynïaid da ka Shillong Sports Association (SSA) hadien ba ki la lah ban bteng jingjop ha ka Sngi Ba-ar.
Ha ka jingïakhun jong ka Group-C, ka Mawkasiang SC ka la pynliem noh ïa ka Nongthymmai R Nongkynrih SC da 3-1 kol na ka bynta ban ïai bat ïa ka kyrdan ba ha kliar bad 9 point na ki lai sien ïakhun.
Hapdeng kane ka jingïakhun ka Nongthymmai ka la pynkhih jar nyngkong eh lyngba u Remingstak L Mawphlang ha ka minit kaba 18. Hynrei ka Mawkasiang ka la lah ban pynïakhaid kylla lyngba u Hame Nongtdu (26).
Ka Mawkasiang ka la pynbud biang ïa ka kol kaba ar lyngba u Lamshai Jana ha ka minit kaba 30. Ha ka kylla miet u Hame u la thep biang sa shi kol ha ka minit kaba 74 na ka bynta ban pynlong shi syndon ïa ka Mawkasiang ban ïoh jingjop.
Ha kawei pat ka jingïakhun jong kane ka group, ka Lapalang SC ka la jop da 2-0 kol ïa ka Summit FA. Kane ka la wan urlong lyngba u Freddy Kharkrang uba la thep ha ka minit kaba 40+1 bad u Sumanki Mannar (68).
Da kane ka jingjop ka Lapalang (6 point) ka la jam sha ka kyrdan ba-ar na ka bynta ban ïoh rung sha ka pre-quarter final hadien ba la tam lyngba ka jingïapher kol bad ka Nongthymmai (6 point), kaba la hiar sha ka kyrdan balai.
Haba phai sha kawei pat ka jingïakhun jong ka Group-D, ka Mawphlang SC ka la pynjem khnap ïa ka Umsohsun SC da 7-0 kol. U Phasdonlang Hynñiewta u la ïoh hat-trick da kaba thep ha ka minit kaba 12, 34 & 54, kumjuh u Dangeitlang Wanñiang (22 & 72) bad u Wilkystar Khongwar (39 & 41), kiba la thep mar ar kol.
Da kane ka nam jop ka Mawphlang ka dang ïai bat ïa ka kyrdan ba ha kliar bad 9 point na ki lai sien ïakhun, katba ka Umsohsun ka dang sah ha ka kyrdan sha trai khlem da lah ban jop na lai tylli ki jingïakhun ba la dep.
Kane ka lympung kan bteng biang ha ka Sngi Balang ha kaba ka Ïateilang SC kan ïakhun pyrshah ïa ka Laitumkhrah SC ha ka por 1:30 mynsngi bad ka Laitlulong SC ïa ka Mawpdang SC ha ka por 4 baje nohphai sngi.
