Imphal, Naitung:
Ki bor pahara ki la kem ïa san ngut ki lehnoh kiba dei na ki ar tylli ki kynhun ba la shah ñiew beaiñ ha Imphal East district ha Manipur, la ïathuh ki pulit ha ka lah sngi U Blei.
Lai ngut ki nongbud jong ka kynhun Prepak ba la shah ñiew beaiñ na ka thaiñ Keirao Khunou ki la shahkem ha ka sngi U Blei, la ong uwei u heh pulit. “Arngut napdeng jong ki ki dei kiba dang pohrta bad kine ki la shah ïalam sha ka jaka ban ai ka jingïada katkum ki kyndon jong ka Juvenile Justice Act,” u la ong.
Arngut ki lehnoh jong ka seng Kangleipak Communist Party (PWG) ba la shah ñiew beaiñ ki la shahkem na Keibi Heikak Mapan Awang Leikai ha ka sngi U Blei, la ong u heh pulit.
Ha ka 6 tarik, Naitung, 2025, ki pulit ka Manipur ki la ïohkem ïa lai ngut ki dkhot ba ehrang jong ka PREPAK na Keirao Khunou kaba hap hapoh ka Irilbung-PS, Imphal East district. Uwei na ki lehnoh ba la shah kem u dei uba la tip kyrteng kum u Laishram Vishan Meitei ba la tip ruh da ka kyrteng kum u Bhojo bad Nongthon (28) na ka shnong Lamphel Sana Keithel, Imphal West district.
Ha kawei pat ka jingkhynra ha Nepali Basti, ha ka thaiñ Santipur ha Bishnupur distrik ha ka sngi Saitjaiñ, ki bor pahara ki la ïoh ban kurup ar tylli ki suloi, ar tylli ki Magazine ba thylli, hynñiew tylli ki Handset, ar tylli ki Mortar ba khlaiñbor, bad katto katne kiwei pat ki tiar, la ïathuh ki pulit.
Ki bor pahara ki la pynlong ïa ki jingkhynra ha Manipur naduh ba la mih ka jingïakynad hapdeng ki jaitbynriew ha ki ar snem ba la leit. Ki la don palat 260 ngut ki briew kiba la ïap bad da ki hajar ngut ki la kylla khlem ïing khlem sem ha ka jingïakynad hapdeng ki kynhun Meitei bad ki kynhun Kuki-Zo naduh u bnai Jymmang, 2023.
Ka sorkar pdeng ka la pynjari ha ka 13 tarik, Rymphang, ïa ka jingsynshar President ha Manipur hadien ba u Myntri Rangbah ka jylla u N Biren Singh u la hiar shuki. Ka ïingdorbar jylla ha kaba ka samoi treikam jong ka kan kut ha u snem 2027 ka la don hadpeng ka jingsangeh treikam.
