Shillong, Naitung 08
Sa tang katto-katne sngi, ka Seiñ Raij Ñiamtre kan sa ïoh ban rakhe biang sa shisien ïa ka lehniam Behdienkhlam kaba dei ka jinglehniam kaba ju leh manla u snem kata ha u bnai Naitung bad ka jingpynkhreh-pynkhrum ha kaba ïadei bad kane ka jinglehniam ruh ka la nang ïaid shakhmat.
Mynta u snem kane ka jinglehniam Behdien-khlam kaba saw sngi kan sdang naduh ka 11 tarik u Naitung ka ban kut pat ha ka 14 tarik u Naitung, 2025.
Ïa kane ka jinglehniam Behdienkhlam la pynlong ban ainguh na ka bynta ka jingot kaba bha, ban beh noh ïa ki jingpang-jingshitom, ki jingsniew bad ban duwai na ka bynta ka jingroi jingpar bad ka jingïada na ki jingma kiba mih na ka mariang.
Ha Sor Shillong, ngi lah ban sakhi ba kane ka jingpynkhreh-pynkhrum ïa kane ka jinglehniam Behdienkhlam da ka Seiñ Raij Ñiamtre Shillong kala ïaid shaid-shaid ha kaba na ka liang ki nongkitkam, ki ‘riew rangbah bad ki samla kynthei bad shynrang ki la don bynta ban shna bad pynitynnad ïa ki rong ban rah shapoh Jowai ha ka 13 tarik u Naitung, 2025 kaba dei shisngi hashwa ban pynkut da ka jingïashimbynta ban shad hapoh Aitnar.
Haba ïoh ban ïakren bad u Bah Shngaiñki Pyrbot, General Secretary ka Seiñ Raij Ñiamtre Shillong, u la ong ba ha Jowai, kane ka jinglehniam Behdienkhlam ka la sdang naduh u bnai Lber ha kaba ki la don ki jinglehniam bapher-bapher katba ha Shillong pat, ka jinglehniam Behdienkhlam ka la sdang ha ka 5 bad 6 tarik u bnai Naitung, 2025 ha kaba ki la ïoh ban leit ainguh-aidem ha manla ki thliew ïing jong ki khon ka Ñiamtre.
“Ngi lehkmen bad burom ïa ka Behdienkhlam namar ka Behdienkhlam ka dei ha ka por ba ka rep-ka riang bad ka don ruh ka jingnguh ïa ka mei ramew bad kumjuh ruh ban weng ïa kano-kano ka khlam ne ka jingpang na u briew ne na kano-kano ka jingthung-jingtep bad ba u nongrep un ïoh ïa u marrep uba bha. Kane ka long ka nongrim haba ïadei bad ka Behdienkhlam bad kam dei tang kata ka jingwan jong u Tre Kirot Kynrad hynrei ka dei ruh kumjuh ïa kine baroh la kyllum lang”, ong u General Secretary.
U Bah Pyrbot u la ïathuh ba ha Shillong naduh ka 10, 11 bad 12 tarik u bnai Naitung, kan don ka jingleit shad ha manla ki dong da kaba khot bad wer lem ïa baroh ki khun ka Ñiamtre bad Ñiamtre Niam Khasi ba kin ïadon bynta lang ha kane ka jingleit shad dong.
Shuh-shuh, u Bah Pyrbot ula ïathuh ba ha ka 13 tarik u Naitung, ka Seiñ Raij Ñiamtre Shillong kan leit ban rah ïa ki rong-ki rup kiba la shna pynitynnad sha Jowai bad ha ka 14 tarik pat kin ïashimbynta lang bad baroh ki dong ka Jowai ban ïashad hapoh ka Aitnar bad da kaba ai khublei Behdienkhlam basuk-bakmen ïa baroh ki paidbah ka Jylla.
