Nongpoh, Naitung 08
Ki runar bym lah satia ban ithuh ha ka miet jong ka Lah Sngi U Blei ki la leit ban wiang ding ïa ki ar tylli kali kamai Auto-rickshaw kiba la pynïeng bad set ha phyllaw jong kawei ka ïing kaba don marjan bad ka Sardarji Dhaba kaba dang hap hapoh ka shnong Mawtnum, Ri Bhoi District.
Katkum ka khubor ba la ïohlum, la ïathuh ba katei ka jingjia ka dei ha ka por kumba 1 baje eiei hynnin miet ha kaba ki runar ki leit ban wiang ding ïa kitei ki kali kiba la pynïeng lang ha kajuh ka jaka kat haduh ba kawei na ki, ka la ingkhong hi khait bad kawei pat ka la shu julor malu-mala hadien ba ki nongñiah ki la kyndit na kaba ïohthiah bad ban pynkynriah noh shawei.
Katei ka Auto-rickshaw kaba la ingkhong ka dei kaba don ïa u registration number ML10-D-0651 bad kaba la long trai da u samla Robertson Marwein na ka shnong Umbuda katba kawei pat kaba shu julor malu mala ka dei kaba don ïa u registration number ML10-D-3492 bad kaba la long trai da u Ba Xavier Thabah.
Haba ïoh ban ïakren bad u samla Robertson Marwein, u la pynpaw ïa ka jingsngewsih jur halor katei ka jingwan thang dusmon ki runar ïa katei ka kali kaba ai kamai bad ai ja ïa u bad ïathuh ruh ba katei kali ka dei kaba u shu shim da ka ram ka shah bad kumba long mynta, ka ram ka dang sah sa kumba shi snem tam eiei bad kren bynñiaw ba naei un ïoh shuh ban siew ïa katei ka ram ka shah haba katei kali kala ingkhong hi khait.
Utei u samla u la ïathuh ba na ka liang ka jong u, u dei u nongrep bad um ju don bynta ban ïasniew ïa shun ne ïathud badno badno ruh bad kane ka jingshah wiang ding katei ka kali kala pynkyndit shikatdei ïa u ba kumno ki briew kin ïoh daw bad nud ban leh kat ïa katei ka kam dusmon.
Na ka liang u Bah Ricky Lyngdoh, nongïalam jong ka seng ki nongñiah Auto ka thaiñ Saiden, u la pynpaw ïa ka jingsngewkhia halor kane ka jingjia bad na ka liang ka seng ka buh ïa ka jingkyntu ïa ki bor pulit ba kin pynsted ïa ka jingtohkit ban lap ïa ki briew kiba donkti bad leh ïa kane ka kam runar.
Halor kane ka jingjia, na ka liang jong ki trai kitei ki ar tylli ki kali ki la leit ban ujor da ka ejahar ha thanad Nongpoh bad kyrpad ïa ki pulit ba kin shimkhia ban pynlong ïa ka jingtohkit halor katei ka kam bad ban pynshitom ïa kiba donkti.
