Shillong, Naitung 08
Kan dei ka sien kaba nyngkong eh ba ka Shooting Association of Meghalaya (SAM) ryngkat ka Natio-nal Rifle Association of India (NRAI) lem bad ka tnat ïalehkai ka Sorkar Jylla ki la soi ïa ka Memorandum of Under-standing (MoU) ha ka Sngi Ba-ar.
Ka jingthmu jong kane ka long na ka bynta ban kyntiew ïa kane ka jingïalehkai siat suloi ha ka Jylla bad khamtam eh ba ka Jylla ka don hapdeng ka jingpynkhreh ban pynlong ïa ka 39th National Games ha u 2027.
Ki nongmihkhmat kiba la pyndep ïa kane ka jingïasoi ki long u K. Sultan Singh, Secretary General ka NRAI, Bah John F. Kharshiing, Presi-dent ka SAM, bad Direc -tor ka tnat ïalehkai u DD Shira.
Ka jingsoi ïa ka MoU ka la long ha ryngkat ka jingïadon lang u Myntri Rangbah ka Jylla u Conrad K. Sangma, bad u President ka NRAI, u Kalikesh Singh Deo, kaba pyni ïa ka jingïateh lang ban kyntiew bad pynneh pynsah ïa kane ka jingïalehkai siat suloi ha ka Jylla.
Kane ka soskular hapdeng lai liang mamla (tripartite agreement) ka khmih lynti ban tei ïa ka jinglong ba biang ha ki bynta baroh naduh ka jaka ïalehkai siat suloi kiba paka, ki coach bad ki prokram ai jinghikai, haduh ban pynkiew ïa ki samla na ki shnong shaduh ki kyrdan bapher-bapher. Kane ka pynpaw ruh ïa ka jingthmu ban pynkylla ïa ka Meghalaya kum ka bynta kaba kynthup hapoh ka jingïalehkai ha ri bad ha pyrthei.
Haba ai jingkren ha katei ka sngi, u Myntri Rangbah ka Jylla u Conrad K. Sangma u la ong, “Ka jingïateh lang mynta ka sngi kan pynkylla ïa ka jingïalehkai siat suloi ha ka Jylla. Ka sorkar ka sngew sarong ban ïatreilang bad ka NRAI na ka bynta ban tei ïa ka rukom ailad ba skhem na bynta ki samla jong ngi ban don ïa ka jingangnud ha kane ka jingïalehkai.”
Na ka liang u Kalikesh u la ai ka jingïaroh ïa ka jingangnud jong ka sorkar Meghalaya bad ong, “Ka thaiñ shatei lammihngi ka don lypa ïa kane ka sap ïalehkai. Kane ka jingïa-teh lang kan ai nongrim ban pynlong ïa ka Megha-laya kum ka jaka ba tbit tam ha ka jingïalehkai siat suloi ha ki snem ban wan.”
U la pynbna ruh ba katkum ka MoU, ka NRAI kan pynlong shisien shisnem ïa ka India Open Shooting Championship ha Meghalaya, kaba lah ban wanrah shibun ka roi ka par ha ka ïoh ka kot jong ka jylla namar ki nongïalehkai palat 4000 kin wan shimet ban ïashim bynta ha ka lympung kaba shi bnai tam ne duna manla u snem.
Katei ka MoU ka kynthup ïa ka jingïatreilang ha ka ban pynbiang ïa jaka ïalehkai siat suloi kiba paka, ka jingai jinghikai (technical training), ka jingai jingïarap ïa ki tiar ïalehkai siat suloi, bad ka pynlong ïa ki jingïakop hapoh ka jylla. Ka jingthmu ka long ruh ban ai nuksa ïa kiwei ki jylla.
Kiwei pat ki heh ophisar kiba la ïadon lang ki long u Dr. Vijay Kumar D, Commissioner ka tnad ïalehkai, Bah P.B War Nongbri, Asst Director ka tnat ïalehkai, ki heh Sorkar ka Meghalaya, u Bah Neil Sootinck, Gene-ral Secretary ka SAM nalor kiwei pat.
Kat kum ka jingïathuh jong u John Kharshiing, la ong ba ka khlur nongïa-lehkai kaba la khur takma rnong ha ka Paris Olym-pic 2024, ka Manu Bhaker ha ka 8 tarik u Jylliew mynta u snem ha Munich, Germany hadien ba la ïoh jingtip ba ka Meghalaya kan pynlong ïa ka Natio-nal Games ha u 2027, ka la buh ka jingkyrpad jur ïa kane ka Jylla ba kan tei noh ïa ka jaka siat suloi (shooting range).
