New Delhi, Naitung 08
Ha kaba ïadei bad ki khubor ba la mih ha ki lad pathai khubor ba ka tnat Financial Services (DFS), tnat Kam Pla Tyngka jong ka Sorkar Pdeng ka la bthah ïa ki Bank ban khang ïa ki account PM Jan Dhan Yojana ki bym treikam, ka tnat Pla tyngka ka la ong ba kam shym la bthah ïa ki Bank ban khang ïa ki account PM Jan Dhan Yojana ki bym treikam.
Ka DFS ka la sdang ïa ka jingïalap kaba lai bnai naduh ka 1 tarik Naitung ha baroh kawei ka ri ban pynïar ïa ka jingpdiang ïa ki account Jan Dhan Yojana, Jeevan Jyoti Bima Yojana, Atal Pension Yojana, bad kiwei kiwei ki skhim jingïarap.
Ki bank kin pynlong ruh ïa ka re- KYC jong baroh ki account ha kane ka jingïalap. Ka DFS ka ïai buddien ïa ka jingdon jong ki account PMJDY ki bym treikam bad ka la ai jingmut ïa ki Bank ban ïakynduh ïa ki briew kiba don ïa ki account ban pynlong ïa ki account jong ki ban treikam. Ka jingdon jong ki account PMJDY baroh ka la nang kiew bad ym shym la don kano kano ka jingjia jong ka jingkhang paidbah ïa ki account PMJDY ki bym treikam satia ba ka tnat ka la ïoh jingtip.
