Washington, Naitung:
U President ka United States, Donald Trump, ha ka Sngi Nyngkong u la ong ba ka America kan sa phah shuh-shuh ïa ki tiar ïakhun thma sha Ukraine. Kane ka jingpynbna jong u Trump ka long ruh hadien ba ka White House ha ka taïew ba la dep ka la pynbna ban sangeh noh ïa ki katto-katne ki jingshalan tiar thma sha Ukraine.
“Ngin hap ban phah kham bun ki tiar ialeh — ki tiar iada nyngkong eh”, la ong u Trump ha ki nongthoh khubor hapoh White House.
“Ki shah ktah jur bha haduh katta-katta”, u la ong shaphang ka Ukraine, katba pynpaw ruh ba um sngewtynnad ia ka jingleh jong u President ka Russia- u Vladimir Putin.
U Putin u la sdang ïa ka jinghiar thma kaba pura ïa ka ri marjan kaba kham rit jong ka Russia ha u snem 2022 bad u la pyni tang khyndiat eh ka jingkwah ban pynkut noh ïa ka jingïakynad wat hapdeng ka jingpynbor na u Trump.
Ka Ukraine ka ïakhun pyrshah ïa ki katto katne ki jinghiar thma ba heh tam jong ka Russia da ki namding bad ki drone ha ka thma kaba lai snem, bad ka jingpynsangeh ïa ka jingpynbiang ïa ki tiar siat ka la wanrah ïa ka jingeh kaba khraw bha ïa ka Kyiv.
Ha ka jingsynshar jong u president barim u Joe Biden, ka Washington ka la kular ban ai jingiarap palat $65 billion ha ka kam shipai sha ka Ukraine.
Hynrei u Trump — uba la artatien la slem bha ia ka jingiarap na ka bynta ka Ukraine — um shym la bud ia katei ka rukom, da kaba pynbna ba ym don jingiarap shipai thymmai na ka bynta ka Kyiv naduh ba u la shimti ia ka kam ha u bnai Jymmang mynta u snem.
