Shillong, Naitung 09
Ha kine ki sngi kiba mynta shibun ki paidbah nongshong shnong jong ka Jylla ki ïakynduh ïa ki jingeh la ka long ban thied ïa ki tiar ki tar ba har rukom na Online ne Offline ryngkat ka jingshah thok kaba jyllei bha hynrei ki paidbah ki kut beit tang ban shu pyni bad pyntip sha ki lad pathai khubor.
Halor kane, na ka liang u Samla Enlang Sawian kum Nongïasaid aiñ hapoh ka Jylla haba ïakren bad U Nongsaiñ Hima ha ka Sngi Balang, ka 09 tarik u Naitung 2025, u la pyntip bad pynshai sha ki paidbah ba ka don ka lad ïa ki ban leit ujor beit kaba ki khot ka Consumer Protection Act 2019.
U samla Enlang u la ong ba ki don ruh ki jingjia ha ki jingshah sumar ba ki don ka jingmynsaw ki nongpang lyngba ka jingleh thurmur ki nongsumar bad bun ki jingeh ba ki ïakynduh. Pynban kane ka shu kut noh tang ha ki media bad kam don kano-kano ka jingujor kaba khlaiñ pyrshah ïa kita.
U la ong ba lyngba kane ka Consumer Protection Act 2019 kan ïarap ïa ki paidbah ba kin tip lada ki ïakynduh ïa kum kita ki jingeh ka don ka lad ka lynti lyngba kane ka aiñ.
U samla Enlang u la pyntip ruh, ba lada ki paidbah ki ïakynduh ïa kum kine ki jingeh ha ka ban thied tiar thied tar, ki bym ïa hap katkum ka jingkwah lane ki tiar ba sniew kumjuh ka jinglap ïa ki ksaiñ ha ki jingbam bad ka jingjia thurmur ki nongsumar ha ki hospital ki dei ban ujor ha ki 3 tylli ki aiñ kiba kynthup ïa ka District Consumer Dispute Forum, ka State Commission bad ka National Commission.
Shuh shuh u la ong ba ym tang katta, hynrei haba ki paidbah ki thied kali, thied jaiñ bad kino-kino ki tiar bad kum kine ki jingjia ba lada ki shah leh thok ki paidbah kin mih shakhmat ban ujor lyngba kane ka aiñ.
Kane ka jingshah leh thok ha kiba bun ki kam la ka long kiba thied ki tiar ki tar ne ka jingngat ha ka apot ba ïap ki bahaïing bahasem ha ki jaka ai jingsumar ka la ju ïai jia bad ki paidbah ki dei ban shlur ban mih shakhmat ban ujor pyrshah ïa kita kiba leh thurmur bad leh thok.
Kane ka Consumer protection act 2019 ka dei kawei ka iktiar kaba kum kita ki paidbah haba ki leit ban thied ne leit shah sumar ha kino-kino ki jaka ai jingsumar, bad lada ki leit pule kum shabar bad kiwei kiwei de ki kam haba ki lap ïa ka jingshah thok ha ki nongpynïaid ki paidbah kim dei ban shu mih tang ha ki social media, hynrei kadon ka lad ka lynti ba kin ujor pyrshah ïa kita lyngba kane ka Consumer protection act 2019.
Namar kata, u samla Enlang Sawian u la kyrpad ïa ki paidbah ba kin sngewbha ban longshlur ban mih shakhmat ban ujor beit pyrshah ïa kita ki briew kiba leh thok khnang ba kum kine ki jingjia kin ym jia shuh nangne shakhmat.
