Shillong, Naitung 09
Ki ar kol ba la thep da u rang-ïalehkai uba dang shu dep soi thymmai u Joao Pedro ki la biang pura ïa ka Chelsea ban pynliem noh ïa ka Fluminense da 2-0 ha ka Sngi Balang bad ban pynskhem na ka bynta ban jam sha ka phainal jong ka Club World Cup.
Une u rangïalehkai na Brazil u la pynkhih jar nyngkong eh ha ka minit kaba 18 jong ka jingïakhun semi final kaba la long ha ka step jong ka Sngi Balang ha MetLife Stadium bad u la thep biang sa shisien pat ha ka kylla miet na ka bynta ban pynlong ïa ka Chelsea ban pynkhreh ïaknieh ïa ka nam lahduh ha ka Sngi U Blei pyrshah ïa ka Real Madrid lane ka Paris Saint Germain.
La soi ïa u Pedro na ka Brighton bad Hove Albion ha ka taïew ba la dep ha ka dor £60 million ($79 million). Une u rangïalehkai, 23 snem ka rta, u la pynlyngkot ïa ka shuti bad ïalehkai nyngkong eh da kaba shong ben ha ka jingïalehkai ba la jop ïa ka Palmeiras ha ka quarter final.
Nangta la ailad ïa u ban ïalehkai ha ka sien kaba nyngkong eh na ka bynta ka Chelsea hadien ka jingduh ïalehkai u Liam Delap.
U Joao Pedro u la kyntait ban lehkmen hadien ba u la thep ïa kano kano ka kol pyrshah ïa ka klob kaba u la sdang ïa ka jingïalehkai jong u bad u la ïalehkai 36 sien ha ka kynhun ba ha khlieh duh shwa ba un leit sha England bad ka Watford ha u snem 2020.
Kane ka jingmih ka pynkut noh ïa ka jingïalehkai bha ka Flumi-nense ha kane ka lympung hadien ba ki nongjop ïa ka Copa Libertadores ha u snem 2023 ki la pynliem ïa ka Borussia Dortmund ha ka jingïalehkai group, kumjuh ka la pynliem ïa ka Inter Milan ha ka pre-quarter final bad ïa ka Al-Hilal, kaba la jop ïa ka Manchester City ha ka quarter-final.
Da ka jingkut noh ka jingïaid lynti katei ka kynhun kaba na South America ha ka Club World Cup, ka Chelsea ka la kam ba ka la jop marsien ïaleh pyrshah ïa katei ka kynhun ka liang pyrshah na Brazil na ka bynta ban jam sha ka phainal.
“Ka dei ka jingjop kaba khraw. Ka la long ka samoi ïalehkai kaba itynnad bha, ki saw tylli ki kynhun ha ka league, ha kaba la jop ha ka Conference League bad mynta ha ka phainal jong kane ka jingïakhun. Ngi sngewkmen haduh katta katta,” la pynpaw u coach ka Chelsea, u Enzo Maresca hadien ba la dep ka jingïakhun.
“Kan dei ka jingïalehkai kaba khatduh jong ka samoi, ngi lah ban ong kumta, bad kyrmen ba ngin lah ban khur ïa ka jingjop ha kane ka lympung.”
Ha kawei pat ka liang u coach ka Fluminense, u Renato Portaluppi, u la batai ïa ka kynhun jongu, kum ka “khun syiar kaba sniew bok” jong kane ka lympung, namar ka jingïapher kaba khraw hapdeng ka mang tyngka jong ki bad jong kiwei pat ki lai tylli ki kynhun kiba dangsah.
Kane ka jingïalehkai ha kaba kut ka la paw ba ka dei ka sienjam kaba palat ïa ka kynhun jong ki, kaba la long kapten da u Thiago Silva, rangïalehkai barim jong ka Chelsea, uba la 40 snem ka rta.
