Shillong, Naitung 09
Namar ka jingjur bad ka jinglap ïa ka jingwan poi ki bar jylla kiba leit trei bylla sha ki jaka bapher-bapher kiba don hapoh ka jylla khlem kino-kino ki kot ki sla kiba biang, ka la pynlong ïa ka Hynñiewtrep National Youth Movement (HN YM), ha ka 9 tarik u Naitung, 2025, ban leit ïakynduh ïa u Commi-ssioner ka tnat Labour ban ïakren halor kane ka bynta.
Hynrei namar ka jing -bym don u Commi-ssioner, ka seng ka la ïoh ban kynduh ïa ka Joint Commissioner jong katei ka tnat treikam.
Haba kren sha ki lad pathai khubor, u Bah Marshall Nonglait, Vice President, u la ong ba bunsien la lap ba ki bar jylla kiba wan trei sha kane ka jylla kim pynbiang satia ïa ki kot ki sla hynrei kaba pynlyngngoh pat ka long ba kine ki bar jylla ki ïoh ban wan laitlan sha kane ka jylla tang lyngba ka jing ‘apply’ jong ki ïa ka ‘Work Permit’ lyngba ka ‘website’ jong ka Sorkar Jylla bad kane ka long ka bym lah ban pdiang satia.
U Bah Nonglait u la ong ba ha ki jaka trei kiba bun la ka long ha ki jaka sor Shillong ne nongkyndong ruh, la sakhi ba la dap sa tang da ki nongtrei bar jylla suda bad ym ïohi shuh ïa ki nongtrei ban dei ki Khasi.
“Kaba sngewlyngngoh ka long ba kumno kane ka Tnat Labour ka treikam ha kano ka nongrim kaba kine ki bar jylla ki ïoh ban wan rung bad ban trei laitluid hangne,” ong u Bah Nonglait. Nalor kata, u Bah Nonglait u la ong ruh ba ka long kaba donkam ba kine ki bar jylla kiba wan ban trei sha kane ka Jylla kin hap ban leh ïa ka Police Verification khnang ba yn lah ban tip ba u briew uba rung sha kane ka jylla u long uba kumno.
U la ong khnang ban wanrah ïa ka jingbha, ka jingshngaiñ bad ka jingpahuh kam-pahuh jam na ka bynta ki samla kiba dei ki paradoh-parasnam ka la pynlong ïa ka seng ba kan shimkhia da kaba wan mih sha kane ka tnat treikam. Halor ka jingbym lah ka tnat ban tehlakam ïa kum kane jingïoh ki bar jylla ban wan trei laitlan hapoh ka jylla khlem da don ïa ki kot-ki sla kiba biang, u Bah Nonglait u la ong ba kiba bun ki tnat treikam jong ka Sorkar Jylla ki long kiba tlot bor ban treikam bad kim pat long kiba kotbor ban trei ïa ka kam katkum ki Aiñ ne ki rukom treikam kiba donkam ban pyntrei katkum ka Tnat.
“Kumno ki bar jylla tang na ka Acknowledgement slip kaba pyni ba ki aplai ban wan trei lyngba ka Tnat Labour ki la lah ban wan rung hangne hapoh Jylla jong ngi? Hato kim don da kiwei-kiwei ki Aiñ kiba lah ban tehlakam ïa ka jingwan rung kyrthep jong ki? Kata ka dei kaei-kaei ka jingkylli kaba khraw. Kumta na ka liang jong ngi, ngi kyntu ïa ka Sorkar ba kan shimkhia bad ban leh eiei kaba donkam ha kaba ïadei bad kane khnang ba ka jingshngaiñ bad ka jingpahuh kam kan don ha ki kti jong ka Sorkar bad hi kti jong ngi,” bynrap u Bah Nonglait.
