Shillong, Naitung 09
Ka Meghalaya State Commission for Women (MSCW) ka la pynpaw ïa ka jingsngewkhia kaba jur halor ka jingkiew ki jingjia jong ka jingshah pynïap ki kynthei bad ka jingshah thombor ki kynthei ha ki distrik bapher-bapher jong ka jylla Meghalaya ha u snem 2025.
Ka Chairperson ka MSCW, Kong Ïamonlang Syiem ka la ong ba ka Commission ka la shimkhia ïa kane rukom long kaba sniew bad ka la buddien ïa kawei-pa-kawei ka jingjia jong ki kam runar pyrshah ïa ki kynthei.
“Une u snem 2025, u la sakhi ïa ka jingshah pynïap ki kynthei bad shah thombor ha ki distrik bapher-bapher jong ka Jylla Meghalaya. Ka dei ka rukom kaba pynkulmar jingmut kaba pynpaw ïa ka jingduhnoh ïa ka jingburom ïa ka jingim briew ha ka imlang-sahlang jong ngi bad ha ka jingshngaiñ jong ki jaka paidbah bad ki jaka shimet na ka bynta ki kynthei bad ki khynnah jong ngi,” ong ka Kong Syiem.
“Ka MSCW ka la shimkhia ïa kane ka rukom long bad ka la buddien ïa kawei-pa-kawei ka jingjia jong ki kam runar pyrshah ïa ki kynthei. Ka Commission ka pynrem beit ïa kine ki kam thombor pyrshah ïa ki kynthei bad ki khynnah rit jong ngi. Ngi la shimkhia ruh ïa ka jingshah leh donbor, ka jingbitar bad ka jingbyrngem kiba paw pyrthei da ki jingujor lyngba ka Commission. Ngi ïohi da ka jingsngewkhia kaba khraw ïa ka jingdon ka jingtieng bad jingbymshngaiñ kaba paw ha ki khep jong ka jingshah lehbeiñ ha ïing ha sem bad ka jingshah lehbeiñ ha ka kam shongkha-shongman ha ka jaka trei,” ong ka Kong Syiem.
Ka Commission ka la kyrpad ïa ki nongshong shnong bad ki bor ba dei peit ba kin long kiba husiar bad pyntip ïa kino kino ki dak ki shin kiba don ka jingbyrngem ne thombor ïa ki kynthei.
“Ngi kyrpad ïa uwei-pa-uwei nongshong shnong bad ki briew kiba donbor ban long kiba husiar bad ban tuklar bad ai jingtip pyrshah ïa kino-kino ki dak jong ka jingbyrngem jong ka jingshah thombor kaba jia ha ka thaiñ ne ka jaka trei jong phi. Ka thong jong ngi ka long ban ïaid shakhmat sha ka jingbym shah ïa kano-kano ka jait jingshah thombor pyrshah ïa ki kynthei bad ki khynnah (naduh ki khynnah shynrang bad kynthei),” ong ka Kong Syiem.
Ka Commission ka la kyrpad ruh ïa ki nongthoh khubor bad ki nongtrei jong ka imlang-sahlang ba kin long kiba don ka jingkitkhlieh bad kaba pyrkhat ïa ka jinglong shynrang bad kynthei ha kaba ki ai jingtip ïa ki mukotduma pyrshah ïa ki kynthei bad ki khynnah.
Ka Commission ka la kyrpad ïa ki paidbah ba kin pyntip lada don kino-kino ki jingthoh kiba jakhlia bad ban kiar na kaba kren ïa ki jingkynthoh kiba jakhlia.
Ka Commission ka wad ruh ïa ka jingïatreilang bad ki nongshong shnong, ki bor synshar bad ki lad pathai khubor ban thaw ïa ka imlang-sahlang kaba kham shngaiñ bad kaba donburom.
