Shillong, Naitung 09
U Symbud Myntri Rangbah ka Jylla, Bah Sniawbhalang Dhar, u la ong ba ngi ngeit skhem ba ki paidbah ba shong die madan ha Khyndai Lad kim dei kiba pyrshah ïa ka sorkar.
Ïa kane u Bah Sniawbhalang u la pynpaw haba kren ïakren bad ki lad pathai khubor ha ka Sngi Balang ka 09 tarik u Naitung, 2025 halor ka jinglong jingman ki nongshong die madan ha Khyndai Lad.
U Bah Sniawbhalang u la ong ruh ba um banse ban ai jingïarap ban pynlong ba kin ïoh ban shong ha ka jaka kaba biang. Wat la ka don ka hukum na ka ïingbishar ruh hynrei ki paidbah ki long kiba lah nang lah stad ban sngewthuh.
U la kyrpad ruh ïa ki nongshong die madan kiba don ha Khyndai Lad ba kin ïatreilang bad ka sorkar. Kam dei satia ba ka sorkar kam lah ban ai jaka ha ka dur kaba ki kwah, hynrei kum u Myntri, un leh katba lah ban trei bad ban pynlong ïa ka jaka ha ka rukom kaba biang ba kin lah ban shongthait ha ka jaka ba la buh.
Haba kylli halor ka jingbym kwah jong ki ban mih na katei ka jaka, u Symbud Myntri Rangbah u la ong, “To ai ba ngi shim ïa kane ha ka liang kaba bha bad ha ka lynti kaba dei.”
Shuh shuh haba kylli pat la ka sorkar kan pyni bor ne em lada kim kwah ban mih na ka jaka ba ki shong die madan ha Khyndai Lad sha ka jaka ba la buh bad ai ka sorkar, na ka liang u Bah Sniawbhalang u la jubab da kaba ong, ba ka sorkar kam donkam ban pyni bor, namar u shaniah ba ki paidbah kin sa mih da lade bad kin ïatreilang bad ka sorkar.
Kum ban shu kdew hangne, dangshen ki briew jong ka tnad Municipal Board ki la leit ban kyndang naphang ïa ki nongshong die madan ha Khyndai Lad ki bym pat don ïa ka Certificate Of Vending (COV) katba ïa ki bym don ïa ka COV pat ki la aipor ba kin kynriah noh sha MUDA shwa ka 22 tarik mynta u bnai.
