Shillong, Naitung 09
U Symbud Myntri Rangbah ka Jylla, Bah Sniawbhalang Dhar, u la ong ba ka Sorkar kan sa phah bun ngut ki pulit sha Lapangap na ka bynta ban ai ka jingïada ïa ki paidbah ba kin sngew shngaiñ.
U Bah Sniawbhalang Dhar kum Myntri ka Sorkar Jylla ha kajuh ka por uba dei ruh Chairman ka Regional Committee West Jaiñtia Hills District, u la pyntip ba shen un sa ïakren bad u Chairman ka Assam Regional Committee ban pynbeit noh ïa ka jingïakynad kaba la jia ha ka shnong Lapangap.
Ka shnong Lapangap ka dei ka shnong kaba hap hapoh ka jaka ïakajia ha Khanduli-Psiar Sector, bad mynta ka kynti ka Meghalaya bad ka Jylla Assam ki dang ïawad ïa ka lynti kumno ban pyn-kut noh ïa kane ka jingïa-kajia pud.
Ha ka jingïakren bad ki lad pathai khubor ha ka Sngi Balang ka 09 tarik u Naitung 2025, u Bah Sniawbhalang Dhar u la ong ba “Ngan sa ïakren bad u Chairman ka Regional Committee na Jylla Assam bad ngin sa shim ïa ka rai ban pynthikna ba kiei-kiei baroh kin long biang kumba ju long katba ngi dang ap ïa ka jingïapynbeit pud kaba shirta hapdeng ki ar tylli ki Jylla.”
Haba pynpaw pat ba ka jingïakren pynbeit pud jong ka wat ba ar hapdeng ka Meghalaya bad Assam ka dang ïaid, u Bah Sniawbhalang Dhar u la ong katba ym pat lah ban pynbeit ïa ka jingïakajia pud, kane ka thaiñ Lapangap kan ym kut ha ka jingïakynad. Nangta u la ong ba ka Khanduli-Psiar bad ka Block-I ki dei napdeng hynriew tylli ki jaka ba don jingïakajia ki ban dang ïa pynbeit.
Shuh shuh u Bah Sniawbhalang Dhar u la kular ruh ba ka Sorkar ka la shimkhia bha ha kaba ïadei bad kane ka kam ban ïa pynbeit noh ïa ka kam ïakajia pud, hynrei kan shim katto-katne por naba ka dei ka kam kaba la sahteng mynta la slem bha.
Haba kylli, u Bah Sniawbhalang u la ïathuh ba u Deputy Commissioner ka West Jaiñtia Hills u la dep aiti ïa ka kaiphod jong ka Regional Committee.
“Ïa ka kaiphod jong ka Regional Committee yn sa aiti noh sha ka Sorkar Jylla hadien ba ngi la dep ïashong jingïalang na baroh arliang,” la bynrap u Bah Sniawbhalang.
U Bah Sniawbhalang u la ïathuh ba u la leit ïuhkjat ha ka shnong Lapangap kaba hap ruh hapoh ka Nartiang Konstitwensi kaba u mihkhmat, ban peitthuh ïa ka jinglong jingman ha katei ka jaka, da kaba kular ruh ïa ki nongshong shnong, ba ka Sorkar kan sa phah bun ngut ki Pulit na ka bynta ban ai ka jingïada ïa ki paidbah ba kin sngew shngaiñ.
“Ngi kwah ba kum kine ki jingjia kam dei shuh ban dang jia nangne shakhmat. Mynta ka jinglong jingman ha katei ka thaiñ ka la jai-jai,” la ong u Bah Sniawbhalang.
U la bynrap ruh da kaba ong, ba halor ka jingkyrpad ki nongshong shnong ka Lapangap, ka Sorkar ka la phah bun ki Pulit ban pynthikna ïa ka jingshngaiñ hapoh katei ka thaiñ.
