Shillong, Naitung 09
Ka prokram jied nongïalehkai athletics ha ka sien kaba ar ka la bteng ha ka 5 tarik ha kane ka nongbah na ka bynta ban pynkhreh ïa ka 39th National Games 2027 ka ban long ha jylla Meghalaya.
Ïa kane ka prokram la pynlong ha SAI Training Centre, Shillong ba la wan shim bynta da 309 ngut ki nongïalehkai athletics kynthei bad shynrang. Kane ka prokram ka long na ka bynta ka East Khasi Hills, West Khasi Hills, South West Khasi Hills, Eastern West Khasi Hills bad Ribhoi District
Kat kum ka kyrwoh ba la pyllait da ka Meghalaya Athletic Association (MAA) la ong ba napdeng kitei 309 ngut, 77 ngut dei ki kynthei bad 232 ngut ki shynrang. Ïa kane ka prokram la pynïaid da 25 ngut ki dkhot ka MAA.
Kane ka synjuk kan leit sa sha Tura ha kaba yn pynlong ha ka 12 tarik mynta u bnai ha P.A Togan Sangma Athletics Stadium bad kane ka long na ka bynta ki nongïalehkai jong baroh ki district ha Garo Hills.
