Shillong, Naitung 09
Uwei u samla na Meghalaya uba la buhrieh ïa la ka kyrteng u la leit sah shimiet sha kawei ka khlaw kaba don harud duriaw Andaman.
Kane ka jingleit sah une u samla sha khlaw ka dei namar um sngewtynnad ban trei ha kawei ka restaurant ha dewlynnong Andaman kaba hap ha Andaman and Nicobar Islands Union territorial jong ka ri India namar ki trai jong kane ka restaurant kiba la kular ha rynsan social media ban ai T. 16,000 shi bnai hynrei ynda u la poi sha katei ka jaka u la ïoh jingsiew tang T. 11,000.
Haba une u samla u la sah marwei ha khlaw, u la kynmaw ban phone ïa u Bah Marvel Sungoh uba trei ha My Home India bad don ha Delhi.
Ban tip kham bniah, U Nongsaiñ Hima u la ïoh ban ïakren bad u Bah Marvel Sungoh lyngba ka phone uba la pyntip ba hadien ba u la ïoh ban ïakren bad une u samla, u la pan jingïarap na uwei u shipai duriaw uba sah ha Andaman bad la ïoh ban leit shaw ïa une u samla na khlaw ban ïalam biang sha kane ka restaurant.
Hadien ba la ïoh ban pynsngewthuh ïa une u samla bad ïa ki trai jong ka restaurant, la lah ban wan ïalam ïa une u samla sha Meghalaya.
U la ïathuh ba une u samla u ïoh jingtip lyngba ki social media ba donkam nongtrei sha Andaman bad u la sdang ban leit trei ha u bnai Jymmang 2025.
U Bah Marvel u la ïathuh ba une u samla u kwah ban leit phai noh sha ïing namar um sngewtynnad ban trei ha katei ka jaka bad kumta ka la pynlong ba un phet leit sah marwei sha khlaw.Shuh shuh u la ïathuh ba u la ïoh ban pan jingïarap na uwei u shipai duriaw bad haba u la lap ïa une u samla na kawei ka khlaw u la shah dait pyrjong baroh shimet nalor ba u khlem bam.
“Haba une u shipai u la lap, u la leit aiti biang sha restaurant bad kumta ka manager ka la knieh ïa ka phone bad hangne ka la pynkulmar ïa ki bahaïing namar kim ïoh phone shuh hynrei da ka jingtrei shitom u la ïoh ban ïakren bad ka manager kat haduh ba ki la shah ïa une u samla ban wanphai biang sha Meghalaya,” u la ong.
U la ïathuh biang ba une u samla ha ka por ba u leit ïa ka bai liengsuiñ la siew da ka kompani hynrei lada u phet hi ka kompani kan ym siew bai lynti bad sa kawei ha Andaman namar ka dei ka dewlynnong bad kumta ka jynjar ban wanphai namar ym don rel hap leit phai beit da ka liengsuiñ. U Bah Marvel u la kyntu ïa ki samla haba ki leit bylla shabar ka jylla kim dei ban phet na jaka trei khlem pat da ot tiket lypa namar kan buh jingeh ïa ki bad ki bahaïing, hynrei ki dei ban mih na jaka bylla tad ynda la ot tiket lada kim kwah shuh ban trei ha kano-kano ka jaka.
