Shillong, Naitung 09
Ka Laitumkhrah ka la jam sha ka pre-quarter final ha ka lympung ïalehkai U-20 Fourth Division 2025 ba la pynïaid da ka Shillong Sports Association hadien ba ka la lah ban pynliem noh ïa ka Ïateilang na Lamlyer da 4-1 kol ha ka jingïakhun jong ka Group-E ha ka Sngi Balang kaba la long ha SSA Stadium kaba ha First Ground, Polo.
U Hamlet Thabah u la thep ar kol, katba ïa ki shi kol la thep da u Damain Nongsteng bad u Dabetskhem Rympei na ka bynta ban pynlong ïa kane ka kynhun ban ïai bteng ban bat ïa ka kyrdan ba ha kliar ryngkat 12 point na ki saw sien ïakhun bad ban tam haduh 6 point ïa ka Mawñianglah kaba don ha ka kyrdan ba-ar.
Tang mar ïasdang ka jingïakhun, ka Ïateilang ka la pynkhih jar nyngkong eh lyngba u Wankitbok Kharumnuid ha ka minit kaba 4. Hynrei ka Laitumkhrah ka la lah ban pynphai kylla haduh saw kol ha ka kylla miet. Kane ka la wan lyngba na ka kol u Damain Nongsteng ha ka minit kaba 57, kumjuh u Hamlet Thabah ha ka minit ba 70 & 80+1 bad ïa kawei pat la thep da u Dabetskhem Rympei (78) na ka bynta ban ïoh jingjop shi syndon.
Ha kawei pat ka jingïakhun jong ka Group-D, ka Laitlulong ka la pynjem khnap ïa ka Mawpdang da 4-1 kol. Wat la ka Mawpdang ka la ïoh ban pynkhih jar nyngkong eh ha ka minit kaba 11 lyngba u Vishalstar Nongbri, hynrei ka Laitlulong ka la lah ban pynphai kylla haduh saw kol. Kane ka la wan urlong lyngba u Bankerlang Khardewsaw (36 & 63) bad u Donkupar Kharbani (58 & 79), kiba la thep mar ar kol.
Lyngba kane ka nam jop ka Laitlulong ka la ïai sah ha ka kyrdan balai ryngkat 7 point na ki lai sien ïakhun bad ka dang don jingkyrmen ban jam sha ka kyrdan ba-ar lada ka Mawphlang ka la lah ban pynliem ïa ka Pommura ha ka 11 tarik kaba long ka jingïalehkai ba khatduh jong ka Group-D. Kumba ka long mynta ka Laitlulong bad ka Pommura ki la ïaryngkat mar 7 point, hynrei ka Pommura ka la tam lyngba ka jingïapher kol.
Ka jingïalehkai ha ka Sngi Palei kan long hapdeng ka Pynthorbah pyrshah ïa ka Nongkohlew ha ka por 1:30 mynsngi, katba ka Mawshbuit ïa ka Laitkroh ha ka por 4 baje janmiet.
