Shillong, Naitung 09
Ka mynsiem ïalehkai phutbol ka la khie im biang ha ka nongbah Shillong haba ïa ki lai tylli ki trophy jong ka 134th Indian Oil Durand Cup la pyni paidbah ha State Convention Centre ha ka Sngi Balang.
Kane ka nongbah Shillong sa shisien kan ïasoh lang bad kiwei napdeng saw tylli ki nongbah jong ka ri India ban pdiang kum ka nongpynlong ïa kane ka lympung kaba heh tam ha ka dewbah Asia.
Ïa kitei ki trophy yn pynïaid kylleng ka nongbah Shillong, Nongstoiñ bad Tura, ha kaba yn ailad ïa ki paidbah ba kin sakhi da la ki khmat ïa kine ki trophy jong kane ka lympung kaba la rim tam ha ka dewbah Asia.
Ha kane ka jingpyllait ïa ki trophy ha State Convention Centre, la ïadon lang u Myntri Rang-bah ka Jylla u Conrad K. Sangma, kumjuh u Myntri ka tnat ïalehkai Bah Shakliar Warjri, u Air Marshal Suraj Singh, u Commanding-in-Chief ka Eastern Air Command, u Lieutenant General Sanjay Malik, SM GOC 101 Area, u Lieutenant Gene-ral Mohit Malhotra, AVSM, SM COS HQ Eastern Command Chairman DCOC nalor kiwei pat.
Haba ai jingkren ha kane ka sngi, u Conrad u la pynpaw ïa ka jingsngew sarong kaba khraw ban pynlong ïa kawei pat ka samoi ïalehkai kaba san bad kaba la rim tam ha ka pyrthei kata ka 134th Durand Cup. “Nga shim ïa kane ka kabu ban ai khublei ïa ka kynhun shipai kaba la jied ïa ka nongbah Shillong kum kawei na ki jaka ban pynlong ïa kane ka lympung. Kin don phra tylli ki jingïalehkai ha J.N Stadium, Shillong.”
“Ha u snem ba la lah ka la long kaba jop ka jingpynlong ïa kane ka lympung ha ka nongbah Shillong ha kaba la sakhi da ki hajar ngut ki paidbah kiba la pyndap ïa ka stadium baroh kawei. Nga lah ban pynthikna ïa phi ba mynta u snem ruh kan long kumjuh. Ka jingdon ki kynhun ïalehkai na ka Jylla kan pynlong ïa ka jingwan tuid ki paidbah ban ai jingkyrshan ïa ki.”
U Myntri Rangbah ka Jylla u la ong, “Ka rukom kyrshan jong ka Sorkar ïa ki jingïalehkai ha kine ki hynñiew snem ba la dep, ka la long kaba kham pher. Ha kine hynñiew snem ba la dep, la thaw haduh 70% ki jingtei ïa ki jaka ïalehkai ha ka jylla, bad, haduh kumba T. 2000 klur la bei tyngka ha ki projek bapher bapher ha ki kam ïalehkai.”
U la ong ba ka Sorkar ka dang ïaid shakhmat ban tei ïa ka Mawkhanu Sports Complex ka ban ngiam haduh 40,000 ngut ki nongpeitkai, ka madan ïalehkai phutbol kaba heh tam ha ka ri. U la pynpaw ïa ki projek ïalehkai bapher bapher ha ka Jylla, kynthup ïa ka jingpynbha ïa ka J.N. Sports complex, ka Mawdiang-diang Sports Complex, ka P.A Sangma Sports Com -plex ha Tura, ka Integrated Hospitality and Sports Complex, Shil-long, Wahïajer Sports Complex ha Jowai, ka P.A Togan Athletic Stadium ha Tura, ka White Water Village ha Umtham bad Umiam nalor kiwei pat.
Mynta u snem ïa kane ka Durand Cup yn sdang naduh 23 tarik mynta u bnai haduh 23 tarik u Nailar, ha kaba yn pynlong ha West Bengal, Jharkhand, Assam, Mani-pur bad ha Meghalaya. Ka nongbah Shillong kan pynlong ïa ki phra tylli ki jingïalehkai, kynthup ïa ka quarter final bad ka semi final ha Jawaharlal Nehru Stadium.
