Shillong, Naitung 10
Ka Laitkroh SC ka la pynliem noh ïa ka Mawshbuit SC da 2-1 kol na ka bynta ban jam sha ka pre-quarter final na ka Group-A ha ka lympung ïalehkai U-20 Fourth Division 2025 ba la pynïaid da ka Shillong Sports Association ha ka Sngi Palei ha SSA Stadium kaba ha First Ground, Polo.
Kane ka nam jop ka la wan urlong lyngba u Seibok Kharkongor bad u Cleaning Nongkynrih na ka bynta ban pynlong ïa ka Laitkroh ban jam sha ka kyrdan ba-ar bad 7 point na ki saw sien ïakhun, katba ka Mawshbuit ka la hiar sha ka kyrdan balai bad 4 point.
Ha kane ka jingïakhun ka Laitkroh ka la pynkhih jar nyngkong eh lyngba u Seibok ha ka minit kaba 8, hynrei ka Lurshai Wankhar u la lah ban pynïakhaid kylla na ka bynta ka Mawshbuit ha ka minit kaba 27. Ka Laitkroh ka la thep biang sa shi kol lyngba u Cleaning Nongkynrih (40+1) na ka bynta ban khur syndon ïa ka jingjop.
Haba phai sha ka jingïakhun jong ka Group-B, ka Pynthorbah ka la pynliem noh ïa ka Nongkohlew da 3-0 kol. U Eshwameda O Shyrnang (80+2 & 80+4) u la thep ar kol, katba ïa kawei pat la thep da u Ïakibanpynshai Rani (40+1).
Wat la ka Pynthorbah ka la ïoh jingjop, pynban kam shym la lah ban jam sha ka pre-quarter final namar ka la wan ha ka kyrdan balai bad 5 point na ki saw sien ïakhun. Te, kumta ki kynhun kiba la lah ban pynthikna na kane ka group ki long ka Them Rangshken (10 point) bad ka Lummawbah (7 point) kiba la wan ha ka kyrdan ba nyngkong bad ba-ar.
Ka jingïalehkai ha ka Sngi Thohdieng kan long hapdeng ka Pommura pyrshah ïa ka Mawphlang ha ka por 1:30 mynsngi, katba ka Dilingiem ïa ka Mawkasiang ha ka por 4 baje nohphai sngi.
