Shillong, Naitung 10
Ka Sorkar Jylla ka la aiti sha ka ïingbishar Meghalaya High Court ïa ka kaiphod tohkit halor ki jingkynnoh ba la tih beaiñ ïa u mawshun ha ka thaiñ Jaiñtia Hills da ka Amrit Cement Industries Limited.
Ïa kane ka kaiphod tohkit la shim ha ka rekod jong ka jingtian bishar halor ka PIL ba la mudui da uwei u Ranjit Chandra Goshwami ha ka Sngi Palei.
Ha ka hukum jong ka, ka division bench jong u Chief Justice IP Mukerji bad u Justice W Diengdoh ki la ai por ïa u nongïasaid aiñ jong u nongmudui ba un thep ïa ka Affidavit kum ka jubab halor kane ka kaiphod, bad kano-kano ka ‘rejoinder’ ïa kane ka affidavit lah ban thep da ka Amrit Cement Industries Limited shwa ka jingbishar ka ban wan ha ka 24 tarik Naitung.
Ïa kane ka PIL la ujor katkum ka jingtip ba la ïoh lyngba ka aiñ Right to Information Act, kaba la ai jingmut ba ka Amrit Cement Industries Limited kam don ïa ka laisen kaba biang ban tih ïa u mawshun.
Katkum ka jingtip, la kynnoh ba katei ka kompeni ka la pyndonkam ïa u mawshun ba la tih beaiñ na ka karkhana jong ka ban pynmih ïa ka dewbilat.
Ïa kane ka PIL la pdiang ha ka 19 tarik u Rymphang, 2025. Ka jingtohkit ba la pynlong da ka Sorkar Jylla ka long katkum ka jingbthah ba la pynmih da ka ïingbishar ha ka 8 tarik u Jymmang.
