Shillong, Naitung 10
Ka Paris Saint-Germain ka la lah ban pynpaw ïa ka jingkhlaiñ bor da kaba ka la lah ban pynliem noh ïa ka Real Madrid da 4-0 kol ha ka semi-final jong ka Club World Cup bad kan ïaknieh ïa ka nam lahduh pyrshah ïa ka Chelsea ha ka Sngi U Blei.
U Fabian Ruiz u la thep ar kol, katba ïa ki shi kol la thep da u Ousmane Dembele bad u Goncalo Ramos.
Ha kane ka jingïakhun kaba la long ha MetLife Stadium kaba ha East Rutherford, ka PSG ka la sdang ban nangïai kiew shaphrang ha ka rukom ïalehkai naduh ba ka la rah nam lahduh ha ka UEFA Champions League bad ka la lah ban pynsngap jar ïa ki 77,542 ngut ki nongkyrshan ka Real Madrid.
Tang mar ïasdang ka jingïalehkai, u Ruiz u la pynkhih jar nyngkong ha ka minit kaba 6 ha shwa ba u Dembele un pynbud ïa ka kol kaba ar ha ka minit kaba 9. U Ruiz u la pynbud ïa ka kol ba ar ha ka minit kaba 24 na ka bynta ban tam 3-0 kol ha ka kylla step. Ïa ka kol kaba saw bad kaba khatduh la thep da u Ramos (87) na ka bynta ban pynlong ïa kane ka kynhun jong u Luis Enrique ban ïoh shi syndon ïa ka jingjop.
“Ngi don ha ka aïom kaba kyrpang, ka por kaba kyrpang, bad ngi long kiba dei hok ban jop,” la ong u Enrique hadien ba la kut ka jingïalehkai. “Ngin sa pyrshang, sa kawei pat ka sienjam pyrshah ïa ka Chelsea. Ki la leh bha, ki la pyni ïa ka jingïalehkai baroh kawei bad mynta ka la dei ka por ba ngin pynkhreh ïa kata. Ngi kwah ban thaw ïa ka khana jingjop jong ka klob jong ngi, bad nangta ban shim katto-katne ka shuti.”
Kane ka jingshah rem ka la pyndiaw mynsiem ïa ka Real Madrid, namar ka la khmih lynti ban long kawei napdeng 32 tylli ki kynhun ha ka Club World Cup ban thaw ïa ka rekod kaba 15 ha ka European Cup.
“Ngim shym la long kiba biang bha mynta ka sngi,” la ong u coach ka Real Madrid, u Xabi Alonso. “Ngim dei kiba nyngkong eh ban shah rem ha ki, hynrei ngi don shibun kiei-kiei kiba bapher-bapher ban pynbha.”
U khlur barim jong ka PSG, u Kylian Mbappe, uba don mynta bad ka Real Madrid, u la ïakhun tyngeh ban wanrah ïa ka jingktah ha ka jingïalehkai ba nyngkong jong u pyrshah ïa ka klob barim jong u, naduh ba u la mih noh mynshem snem.
Ka PSG ka la lah ban jop wat lada ka la duh noh ïa u Willian Pacho, uba la shah sospon, ha kaba u Lucas Beraldo u la lah ban ïalehkai bha ha ka bynta shadien.
Ka Real Madrid ka la mad ïa ka jingeh, ha kaba ka la ïalehkai khlem u Dean Huijsen uba la shah sospon bad ka la duh ruh ïa u Trent Alexander-Arnold.
