Shillong, Naitung 10
U MLA ka BJP na South Shillong, Bah Sanbor Shullai shen un sa ïalam ïa ka kynhun jong ka Shillong Cantonment Board (SCB) bad ka Shillong Cantonment Area Development Committee (SCADC) ban ïakynduh ïa u Myntri Ïada Ri ka Sorkar Pdeng u Rajnath Singh ban kyntu ba un tuklar lem ban pynkloi ïa ka jingmynjur ba khatduh ïa ka Draft Shillong Cantonment Building Byelaws 2025.
“Ïa ka draft building byelaws la phah sha ka ophis jong u DG, DE Guwahati ban ai jingmynjur na ka JOC in-charge headquarter EAC Shillong, bad ïa ka jingmynjur ba khatduh yn sa ai da ka Ministry of Defence ha Delhi. Kumta, kum u MLA ka thaiñ ryngkat bad ki briew jong ka SCB bad ki dkhot ka SCADC, ngi dang pynbeit ban ïakynduh ïa u Rajnath Singh ban pynkloi ïa ka jingmynjur ba khatduh na ka miej jong u,” ong u Bah Sanbor haba kren sha ki lad pathai khubor ha ka sngi Palei.
U Bah Sanbor uba dei ruh u President ka SCADC, u la kdew ruh ba ka draft jong ka Shillong Cantonment Building Byelaws 2025 kum ka jingpynroi kaba kongsan na ka bynta ki nongshong shnong jong ka thaiñ Cantonment bad u la ong ba kane ka la wan urlong hadien 53 snem jong ka jingïoh ïa ka jylla Meghalaya.
“Shisien ba la mynjur, ki aiñ shna ïing kin pynlah ïa ki nongshong shnong ban pan jingbit ban tei ïing, bad yn pynlong ïa ka jingwad bniah ban pynsuk ïa ka jingtreikam,” u la ong da kaba bynrap, “Tang hapoh ka por kaba lyngkot, kyrmen ba hapoh 2-3 bnai kan long ka por kaba kongsan na ka bynta baroh ki nongshong shnong jong ka thaiñ Cantonment ban tei ïing.”
Ki jaka ba hap hapoh ka Shillong Cantonment ki kynthup ïa ka Jhalupara, Paltan Bazar, Lower Paltan Bazar, thaiñ Military Hospital, Dojon Line, Anjalee, Lady Keane, Lum Survey, Geonka Compound, Burma Line bad Mathura Compound.
Ïa kane ka draft Building Byelaws la bishar bniah da ka Meghalaya Urban Development Authority (MUDA) ha ka jingïalang kaba la long ha ka 1 tarik Naitung.
U Bah Sanbor u la pynpaw ba ka draft building byelaws ka kwah ban ailad ban tei ïa ki ïing G+3 ne ka ïing 4 mala ha ki jaka kiba don ïa ki surok ïaid kali bad ka jingtei ïa ki ïing G+2 ne ïing 3 mala ha ki jaka ki bym lait ki kali ryngkat bad ka jaka kaba haduh 1000 square feet yn shah ban tei ïa ka ïing G+3.
Haba ïadei bad ki jingtei beaiñ ha katei ka thaiñ, u Bah Sanbor u la pynpaw ba ki bor ïada ri bad ka Shillong Cantonment Board ki la shimkhia ban pynpra ïa kum kine ki jingtei, bad ki rai jong ka ïingbishar ka la kyrshan ïa ki bor ba dei peit.
