Shillong, Naitung 10
Ka Myntri ka tnat Pla Tyngka jong ka Sorkar Pdeng, ka Nirmala Sitharaman ha ka Sngi Palei ka la plie paidbah ïa ka jaka die jingdie kaba nyngkong eh jong ka nongbah kaba la tip kum ka Polo Commercial Complex, kaba long ruh kum ka jingsdang ïa ka jingpynkylla dur ïa ka Sor hapoh ka Smart City Mission.
Kane ka jingtei kaba T.100.33 klur ka ïeng kum ka sakhi ïa ka jingkiew stet jong ka Meghalaya ha ka liang ka jingtei, kaba pynïasoh lang ïa ka jingtei khaïi-pateng kaba mynta bad ka jingpynwandur ïa ka Sor.
“Kane ka dei ka sienjam kaba kongsan ha ka jingïaid lynti jong ka roi ka par jong ka nongbah Shillong,” ong ka Sitharaman ha ka jingïalang plie paidbah, ha kaba la don ryngkat lang da u Myntri Rangbah ka Jylla, u Conrad K. Sangma, ki Symbud Myntri Rangbah ka Jylla, Bah Prestone Tynsong bad u Bah Sniawbhalang Dhar, ka Myntri ka tnat ka koit ka khiah ka Sorkar Jylla, Kong Ampareen Lyngdoh, u Chief Secretary ka Sorkar Jylla, Bah Donald P. Wahlang, IAS, bad u Commissioner & Secretary ka tnat Urban Affairs ka Sorkar Jylla, u Dr. Vijay Kumar, IAS, ki ophisar ka tnat Urban Affairs bad ka Municipal.
Haba ai jingkren ha kane ka sngi, u Myntri Rangbah ka Jylla, Conrad K Sangma, u la ong ba ka nongbah Shillong kam da don eh ïa kata ka projek kaba kham heh bad kaba biang mynshwa hynrei la lah ban pynurlong bad plie ïa kane ka projek ha ka sien kaba nyngkong hapoh ka Nongbah Shillong.
“Naduh ba la buh ïa u maw nongrim ha ka 28 tarik u Risaw, 2020, haduh ban da pyndep ha u Nohprah 2024, ka Polo Commercial Complex ka la paw kum ka dak kaba sngew sarong jong ka jingkylla jong ka nongbah Shillong sha ka nongbah kaba stad kaba don ïa ki jingdonkam paidbah kiba pawnam ha ka pyrthei,” ong u Myntri Rangbah.
Shuh-shuh, u Myntri Rangbah u la ong ba kin dang don shibun tylli ki projek kiba dang ïai mih nangne shakhmat kum ka New Shillong Project bad kan dei kawei kaba kongsan tam hapoh ka nongbah da kaba bynrap ruh da kaba ong ba kane kan long ka lynti ka ban kyntiew shuh-shuh ha ka kam pynroi hapoh ka Nongbah Shillong.
Ha kajuh ka por, u Myntri Rangbah ula ïathuh ba hapoh katei ka Complex, kin don ki jaka bam, ki jaka ïalehkai jong ki khynnah kumjuh ruh ki dukan kiba ki samla ki lah ban sdang ha ka seng kam seng jam dalade.
Kane ka jaka kaba la pynphriang ha ka jaka kaba 1.26 akar bad ka jaka ba la tei kaba long 1.70 lak sq ft, kane ka jaka kaba la shna bha ka don 109 tylli ki jaka die marbam bad 8 tylli ki commercial ophis, kaba ai ïa ki jaka kiba naduh 4470.40 sq ft haduh 396 sq ft. Kane ka jaka die jingdie ka don ruh ïa ka jaka bam bad jaka ïalehkai kaba heh 15,270 sq ft, kaba la pynkhreh ban long ka jaka lehkai bad jaka die marbam hapdeng jong ka Sor.
La shna katkum ki rukom long jong ka pyrthei ba mynta, ïa kane ka jaka la pyndap da ki phra tylli ki lift, 12 tylli ki jaka kiew, 5 tylli ki jaka mih kyrkieh, 86 tylli ki jaka ïeng kali, bad 50 tylli ki jaka ïeng kali ar shaka. Na ka liang ka jingtei, la pynskhem ïa ka da ka jaka pynkhuid um jakhlia kaba 75 KL, ki kor pynkhuid um, 110 tylli ki CCTV, bad ka rukom pynïaid ïa ki ïing (BMS) kaba pura.
Da kaba ïaid ryngkat bad ki kyndon ban pynneh pynsah ha ka pyrthei, ka jaka die jingdie ka pynrung ïa ki lad pynmih bor sngi na jrong ïing bad ka rukom lum um slap, kaba pynpaw ïa ka jingkylla kaba jyrngam ha ka jingtei ïa ki kam khaïi ha sor.
