Shillong, Naitung 10
Ka World Boxing (WB) bad ka tnat ïalehkai jong ka Sorkar Pdeng ki la pynmih ïa la ki jingbthah ba kyrpang sha ka Indian Olympic Association (IOA) ban pynthikna ba ïa ka ilekshon ba la pynslem jong ka Boxing of India (BFI) dei ban pynlong noh kham kloi.
La ïoh jingtip ba ka komiti shipor jong ka BFI ka dang pynkhreh ban sdang ïa ka ilekshon da kaba buh ha ka jingmut ïa ka jingbthah jong ka synjuk ïalehkai ka pyrthei ban pynlong ïa katei ka ilekshon hapoh ka 31 tarik u Nailar mynta u snem.
Ka samoi treikam jong ka executive committee jong ka BFI ka la poi sha kaba kut ha ka 2 tarik u Rymphang, ha katba ïa ka ilekshon la buh por ban pynlong ha ka 28 tarik u Lber, hynrei ym shym la lah ban pynlong namar ba bun ki mukotduma ba la mudui ha ki ïingbishar da ki kynhun bapher-bapher jong ka BFI kiba tuklar ïa ka rukom treikam. Halor ka jingbthah jong ka WB, la thaw ïa ka komiti ba shipor ha ka 7 tarik u Ïaïong na ka bynta ka por kaba ym palat ïa ka 90 sngi ban peit ïa ki jingpynïaid ïa ki jingïalehkai ïakura ha ka ri.
Na ka liang ka tnat ïalehkai ka la thoh sha ka Indian Olympic Association (IOA) ban pynthikna ba ka ilekshon jong ka synjuk ïakura hapoh ka ri dei ban pynlong noh kham kloi namar ba ka jingpynslem ka la wanrah ïa ka “jinglong thylli ha ka rukom pynïaid” ha ka BFI.
“Ka samoi treikam ba 90 sngi jong ka komiti shipor ba la thaw da ka World Boxing mynta ka la jan kut noh. Hynrei ki jingeh kiba ïadei bad ka jingpynlong ïa ka ilekshon jong ka BFI ki dang sahkut haduh mynta, kane ka jingpynslem ka la long kaba la slem bha ha kaba ka la wanrah ïa ka jingthylli ha ka rukom pynïaid ha BFI, kaba ktah ïa ka jingsynshar bad ka jingkyntiew ïa ka kam ïalehkai ïakura ha ka ri,” ong ka tnat ïalehkai ha ka shithi ba ka la phah ha ka 5 tarik mynta u bnai sha ka President ka IOA ka P.T Usha.
Ka tnat ka la kyrpad ïa ka IOA “ban thaw ïa ka rukom treikam kaba ai ïa ka lad kaba biang ban ïaid shakhmat, da kaba ïamir jingmut bad ka World Boxing, ban pynthikna ba ka ilekshon dei ban pynkloi katkum ki kyndon jong ka National Sports Code bad ki aiñ rit jong ka BFI.”
“Da kaba shim khia ïa ka jingangnud ki nongïalehkai, ka tnad ka la kyrpad ïa ka IOA ban shim khia mardor halor kane ka bynta bad ban pyntip ïa kane sha ka tnad ïalehkai halor kino-kino ki bynta,” la pynpaw ka kum ka kyrwoh ba la phah sha ka IOA.
Halor kane ka bynta, ka Usha ka la ïakynduh ïa u President ka WB, u Boris van der Vorst ha Lausanne ha ka 30 tarik u Jylliew katba u dang leit jngoh ïa ka ophis treikam jong ka IOC ha kaba ïadei bad ka jingthmu jong ka India ban pynlong ïa ka Olympic ha u snem 2036. U Boris u la ong ba ka dei ka “jingïakren kaba pynmih jingmyntoi bad kaba don jingmut” halor ka jingïalehkai boxing jong ka ri India. “Ngi la kren kyrpang shaphang ki jingthmu ba la ïalam da ka komiti ba shipor ban wanrah ïa ka jingïaid ryntih bad jingshai ha ka rukom treikam jong ka BFI.”
