New Delhi, Naitung 10
Ka Sorkar Pdeng ka la mynjur ban pyllait pisa haduh T.1,066.80 klur sha ki hynriew tylli ki jylla kiba la shah ktah na ka shlei um bad ka twa khyndew. Ka Meghalaya kawei na ki jylla kaba la shah ktah, ka la ïoh ïa ka bhah kaba long T.30.40 klur.
Napdeng ki hynriew tylli ki jylla kiba la shah ktah na ka shlei um, ka Assam ka la ïoh T.375.60 klur, ka Manipur ka la ïoh T.29.20 klur, ka Meghalaya ka la ïoh T.30.40 klur, ka jylla Mizoram ka la ïoh ïa ka bhah T.22.80 klur, ka jylla Kerala ka la ïoh T.153.20 klur bad ka jylla Uttarakhand ka la ïoh T.455.60 klur.
Kane ka pisa kaba la mynjur ban pyllait ka long kum ka bhah jong ka Sorkar Kmie na ka State Disaster Response Fund (SDRF). Kine ki jylla ki la shah ktah namar ka jingjur palat u slap, ki jingshlei um bad ki jingtwa khyndew ha ka por jong ka jingther jong u slap ba jur mynta u snem.
Hapoh ka jingïalam jong u Myntri Rangbah-duh u Narendra Modi bad ka jingpynïaid jong u Myntri ba khmih ïa ka tnat Kam Pohïing ka Sorkar Pdeng u Amit Shah, ka Sorkar Pdeng ka la shimkhia ban ai baroh ki jingïarap sha ki jylla kiba la shah ktah na ka jingshah lynshop ha ka shlei um, jingtwa khyndew, lyoh. Ka Sorkar u Modi ka la ïeng skhem bad ki jylla ha baroh ki jinglong jingman.
Mynta u snem, ka Sorkar Pdeng ka la dep pyllait haduh T.6,166.00 klur na ka SDRF sha 14 tylli ki Jylla bad T.1,988.91 klur na ka NDRF sha ki 12 tylli ki Jylla. Nalor kata, la pyllait ruh T.726.20 klur na ka State Disaster Mitigation Fund (SDMF) sha 5 tylli ki Jylla bad la pyllait ruh T.17.55 klur na ka National Disaster Mitigation Fund (NDMF) sha 2 tylli ki Jylla.
Ka Sorkar Pdeng ka la ai ruh ïa baroh ki jingïarap ha ka liang jong ka jingdonkam, kynthup ka jingpynpoi ïa ki kynhun NDRF kiba donkam, ki kynhun shipai bad ka jingkyrshan jong ki shipai suiñ sha baroh ki Jylla kiba shah ktah ha ka jingshlei um, ki jingtwa khyndew, u lyoh. Ha kane ka por slap, 104 tylli ki kynhun jong ka NDRF ki dei kiba la phah sha 21 tylli ki Jylla/UT na ka bynta ki kam pyllait im bad ai jingïarap.
