Shillong, Naitung 10
U Myntri ka Sorkar Jylla uba dei peit ïa ka tnat Social Welfare bad ruh u nongaiktien ka Sorkar MDA-II, Bah Paul Lyngdoh, u la ong ba ka Kynhun Myntri ka la shong pyrkhat kam mynta ka sngi hapoh ka jingïalam u Myntri Rangbah ka Jylla, u Conrad K. Sangma bad ngi la shim bun ki rai ban ym donkam shuh ban don ïa ka ‘personal interview’ kum kawei na ki eksam kaba khot thung kam ha ka Grade-D.
Haba kren sha ki lad pathai khubor ha ka Sngi Palei, ka 10 tarik u Naitung 2025, u Bah Paul u la pyntip ba ka Kynhun Myntri mynta ka sngi ka la shim ïa ka rai ban pynduh syndon ïa ka ‘interview’ ha ka jingthep kam Grade-D ha baroh kawei ka Jylla kum shibynta ban wanrah ïa ka khuid ka suba ha ka thung kam thung jam.
U la ong ba kane ka rai ban pynduh noh ïa ka ‘interview’ ha ki kam Grade-D ka long kaba ïahap bad ka policy ba ngi la buh ban pynthikna ïa ka jingshisha bad ka jingïarai hok ha ka jingthep kam ha ki kyrdan bapher-bapher.
“Kane ka dei ruh kum shibynta jong ka jingpyndep ïa ki jingbthah na ka Sorkar India lyngba ka Ministry of Personnel, Public Grievances and Pensions bad ka Department of Personnel and Training (DoPT),” la ong u Bah Paul.
U la bynrap ruh da kaba ong, ba ka nongrim jong kane ka rai ka long ba baroh ki jingthep kam ha ka Grade-D, kin sa long khlem da don shuh ïa ka ‘interview’. Bad kane kan treikam naduh ka 1 tarik u Risaw 2025, kaba mut naduh katei ka tarik ba la buh, ki nongthep kam kin ym donkam shuh ban shong ‘Interview ne Personal Interview.
Shuh-shuh, u la ong ba kane ka jingbym don shuh ïa ka ‘interview’ kan pynthikna bad ban ïarap ruh ban pynleit jingmut ïa ka jingpynïaid ha ka rukom thep kam bad ban pynshai, ban pynïaid beit ïa ka rukom treikam jong ka Sorkar.
