Shillong, Naitung 10
Ki pulit ka jylla Meghalaya ki la ïoh ban kem noh ïa ki ar ngut nong Bangladesh kiba la thmu ban leit phai sha ri lajong.
Kane ka jingïoh kem jong ki pulit ïa kine nong Bangladesh ka la long lyngba ka jingtip kaba la ai da ki shipai Border Security Force (BSF) ba ki don ki nong Bangladesh kiba shong ha ka kali Tourist kaba don ïa u registration number ML10-D-4104, kiba la thmu ban leit phai noh sha ri lajong.
Halor kane ka jingtip, ki pulit ki la ïoh ban bat noh ïa katei ka kali ha Mawlai Bypass, Shillong, bad haba la tohkit ïa ki briew kiba shong ha kane ka kali la shem ba ki don ar ngut ki nong Bangladesh bad ar ngut ki nong India kiba ïarap ban pynphai sha Bangladesh ïa kitei ar ngut. La rah noh ïa baroh saw ngut ban pynlong ka jingtohkit.
La ong ba ïa kine ki briew la ïoh ban bat ha ka por kumba 6 baje janmiet jong ka 8 tarik mynta u bnai bad katei ka kali Maruti Alto ka dei kaba la ñiah da u Ridonlang Lakhiat (31 snem) ryngkat sa lai ngut ki briew hapoh katei ka kali, kata u Md. Rahul Rana (27 snem), ka Suma Ghosh (20 snem) bad u Johnwell Kharkongor (29 snem).
Shuh-shuh, la ong ba ha ka jingpynlong ïa ka jingtohkit, ym shym la lap eiei na ka met jong ki, hynrei la lap ba u Md. Rahul Rana bad ka Suma Ghosh ki dei ki nong Bangladesh bad ba ka kyrteng kaba shisha ka jong ki, ka dei u Md. Nasiruddin Kazi bad ka Suma Begum, kiba la wan rung beaiñ shapoh u pud u sam jong ka India bad la kynnoh ba ki la thmu ban leit phai sha Bangladesh lyngba ka Pynursla.
Nalor kane, la ong ba u Johnwell Kharkongor, uba la leh kum u mynnong (agent) u dei uba la thmu ban ïalam ïa kine nong Bangladesh sha Pynursla bad ban aiti pat sha uwei u briew ba la tip kyrteng kum u Alexander Lyngdoh ban ïarap pat ïa ki ban jam sha shiliang Bangladesh ha ka por mynmiet.
Ha kaba ïadei bad kane ka jingïoh bat, ki pulit ki la ïoh ban kurup noh ïa ki aadhaar card thok na kitei nong Bangladesh.
Ka jingïai bteng ha ka jingïatreilang hapdeng ki shipai BSF bad ki pulit ka jylla ka long kaba donkam haduh katta-katta ban ïakhun pyrshah ïa kine ki kam sniew ha khappud bad ka Bangladesh.
