Shillong, Naitung 10
Ka Tnat Municipal Board ha ka Sngi Palei, ka 10 Tarik u Naitung 2025, ka la pynkhreh shaid-shaid ban shna sa ïa ka jaka hajrong ka MUDA ban shong kiba die madan ha shilynter ka surok ha Khyndai Lad.
Kane ka jingpyntrei ïa katei ka jaka hajrong MUDA ka la sdang naduh ki taïew ba la dep bad mynta la ïohi ba ki la sdang sa ban pynïeng ïa ki nar ban shna la ki jong ki jong ki jaka ban die jingdie na ka bynta kiba shong die madan ha Khyndai Lad.
Ha kine ki sngi ba la dep na ka liang ka tnat Municipal Board ka la dep ban pynshna ïa ki dukan na ka bynta kiba shong die madan ha khrum MUDA ban phah kynriah noh ïa baroh kiba shong die madan na Khyndai Lad sha katei ka jaka, hynrei ka la mih ka jingbymhun na kiba shong die madan ban kynriah sha khrum MUDA, da kaba pynpaw ba katei ka jaka kam long kaba biang ïa ki ban die jingdie.
Hadien kata ki nongshong die madan ki la dawa ruh na ka sorkar ba ka dei ban ai ka jaka kaba biang ïa ki ban kynriah na Khyndai Lad ban leit die jingdie ym ban pynshna ha khrum MUDA kaba baroh kiba shong die madan kim shym la pdiang satia.
Kum ban shu pynkynmaw hangne ba ka tnat Municipal Board dangshen ka la leit ban kyndang naphang ïa kiba shong die jingdie madan ha lynti ïaid kjat ha Khyndai Lad na bynta kito ki bym don ïa ka Certificate Of Vending (COV), katba ïa kiba don ïa ka COV pat la hukum ba kin leit ban kynriah noh sha khrum MUDA ba ka tnat Municipal ka la dep ban pynshna na ka bynta jong ki. Hynrei ka la mih pat ka jingbym hun na ka liang kiba shong die madan, da kaba kynnoh ba ka Sorkar ka shna ïa katei ka jaka ha khrum ka MUDA khlem da pyntip lang ïa kiba shong die madan ban ïa pyrkhat kumno ban shna bad haei ka jaka kaba biang ba kan long kaba itynnad bad biang ban shong ïa ki.
Kumta, na ka liang ka Tnat Municipal Board mynta ka la sdang ban pynshna ïa ki dukan na ka bynta kiba shong die jingdie madan ha Khyndai Lad sa hajrong MUDA bad kat haduh mynta ka jingpyntrei ïa kitei ki dukan ka dang ïaid shaid-shaid.
