Shillong, Naitung 11
Ka Myntri Tnat Pla Tyngka jong ka Sorkar Pdeng, ka Nirmala Sitharaman ka la pynbna ba ki don 92 tylli ki shnong kiba don ha kylleng khappud jong ka Jylla Meghalaya bad ka Ri Bangladesh, ki la shah kynthup ha ka bynta ba-ar jong ka Vibrant Villages Programme jong ka Sorkar Pdeng ne kum ki shnong banyngkong eh ka Ri India.
Haba kren sha ki lad pathai khubor ha ka Sngi Thohdieng ka 11 tarik Naitung 2025, ka Sitharaman ka la ong ba ki shnong kiba don harud khappud jong ka Bangladesh la ithuh na ka bynta ka jingpynroi kaba thmu ban kyntiew ïa ki jingtei bad ka jingpynïasoh ha ki thaiñ khappud kiba long kiba kongsan na ka bynta ka jingshngaiñ jong ka ri bad ka jingkiew ha ka thaiñ.
Ka Myntri ka la ong ba kan sa leit jngoh hi dalade ha ka 12 tarik Naitung 2025, sha katto-katne na kine ki shnong khappud ha ka jingwan jngoh jong ka sha Meghalaya ban ïakynduh bad ïoh ïakren bad ki nongshong shnong ha ka ban ïoh bishar bniah ïa ki jingeh bad ki jingdonkam jong ki nongshong shnong khnang ba ka Sorkar kan lah ban theh ïa ki song pynroi sha kine ki shnong.
Ka Myntri ka la ong ruh ba ka Vibrant Villages Programme kam dei tang ha Meghalaya hynrei la pyntreikam ruh ha ki shnong kiba don ha khappud jong ka Ri India bad ka Myanmar, Tibet, China, bad Nepal.
Haba kdew halor ka jingkyrshan pisa da ka Sorkar Pdeng ïa ka Jylla Meghalaya, ka Sitharaman ka la ong ba ka Tnat Pla Tyngka ka peit ïa ka jingpynkylla ïa ka khajna da ka Sorkar Pdeng bad bynrap da kaba ong ba ka pisa khajna la aiti sha ka Meghalaya da katno shuh.
Nalor kata, ka Myntri ka la wanrah ka jingïanujor kaba shai bha hapdeng arphew snem kata naduh u snem 2004 haduh u snem 2014, ha kaba ka Jylla Meghalaya ka la ïoh T. 7,273 klur ha ka jingpynkylla ïa ka khajna.
“Kane ka jingkheiñ ka la kiew sha ka T. 48,883 klur hapdeng u snem 2014 bad 2024, kaba pyni ïa ka jingkiew kaba khraw haduh 572%,” ong ka Myntri.
Ka la ong ba ki grant bad ki jingïarap jong ka Sorkar Pdeng ruh ki la kiew bha ha kaba ha ki snem 2004 haduh 2014, ka Jylla Meghalaya ka la ioh T. 19,700 klur kum ka grant-in-aid.
“Ka don ka jingïapher, ha ka por 2014 haduh 2024, la ïoh T. 40,452 klur ha ka jingai jingïarap sha ka Jylla”, ong shuh-shuh ka Myntri.
Haba ïadei halor ka jingshah ktah ki Jylla hadien ka khlam Covid-19, ka Myntri ka la pynpaw ïa ka jingïarap ba kyrpang kaba la tip kum ka Special Assistance to States for Capital Investment (SASKI), kaba dei ka jingthmu ai ram khlem jingsiew sut kaba 50 snem.
“Naduh u snem 2020, T. 5.4 lak klur la pyllait sha baroh ki jylla kiba hap hapoh ka SASKI. Na kane, tang ka jylla Meghalaya ka la ïoh T. 5,471 klur”, ong ka Sitharaman.
Ka Myntri ka la kdew ruh ïa ka jingpynkylla dur kaba jylliew hapoh ki jingpynkylla jong ka Sorkar Pdeng, da kaba kdew ba palat 90% na ki jaka katkum ka jingdro (map) ha kylleng ki jylla la pynkylla dur, bad ba baroh ki jylla ki la shim ïa ka rukom pynïohnong paidbah kaba la pynkylla dur bad 22 tylli ki jylla ki la pyni ïa ka jingkiew ha ka jingpynlut pisa.
Ka la ong ba tang ha Meghalaya, la thaw haduh 67 tylli ki Farmer Producer Organisation (FPO) na ka bynta ban pynkupbor ïa ki nongrep bad ban kyntiew ïa ka ïoh ka kot ha ki thaiñ nongkyndong da kaba kyntait ruh ïa kano-kano ka jingkiew dor jong ka dor bad ka la pynpaw biang ïa ka jingkular jong ka Sorkar ban pynbeit ïa ka pla tyngka bad ka jingbei tyngka.
Da kaba pynkut, ka Myntri ka la kdew ruh ïa ka PM Internship Programme kaba dei ka prokram jong ka Sorkar Pdeng kaba thmu halor ka jingïatreilang jong ki samla bad ban pynim biang ïa ka ïoh ka kot ha ka Ri baroh kawei.
