Shillong, Naitung 11
Ka Myntri Tnat Pla Tyngka bad kam Kompeni jong ka Sorkar Pdeng ka Nirmala Sitharaman mynta ka sngi ka la ïaroh ïa ka jingstad ba shirta jong ka pyrkhat pyrdaiñ tynrai jong ki Khasi ban pynpaw ïa ka jingdonkam jong ka kam khaïi-pateng kaba dei, ka roi ka par kaba neh, bad ka jingsynshar kaba pynshong nongrim ha ki briew.
Ïa kane, ka Myntri ka la kren ha ka jingïalang buh mawnongrim ïa ki projek pynroi ba kongsan ha Umsawli, Shillong.
Ka Myntri Tnat Pla Tyngka ka la pynpaw ruh ïa ka jingsngewnguh jong ka ïa ka jingngeit kaba don nongrim ha ka kolshor jong ka thaiñ, da kaba ong, ba kine ki nongrim ki lah ban ai ïa ka nongrim kaba don akor bad kaba neh na ka bynta ka kam khaii bad ka jingsynshar jong kane ka juk.
Ka Myntri ka la ban jur ïa san tylli ki nongrim jong ki Khasi kum ki rishot jong ka roi ka par kaba neh, ba kynhtup “Ka Tip Briew Tip Blei” ha kaba ka la pynpaw ïa ka rukom pyrkhat kaba pynshong nongrim ha ki briew kaba dei ban long ha ka phang pdeng jong ka polisi bad ka jingtrei kam.
“Kane ka jingmut ban ïohi ïa ka jinglong Blei ha ka jinglong briew ka long kaba jylliew, bad ka pynpaw ïa ka rukom treikam jong ka sorkar jong ngi. Da kaba pynskhem ïa ka kam jong ngi ha kane ka nongrim, man la ka sienjam ka kylla long kaba sngewtynnad bad kaba don jingmut,” la ong ka Myntri. Nangta ka Myntri ka la banjur sa ïa kawei ka kyntien ba ong “Kamai ïa ka Hok” da kaba ban jur ïa ka kamai kajih kaba hok bad ka jinglong hok ha ka kam, ka dor kaba ka la ithuh kum ka phang pdeng jong man la ka thong kaba bha. “Ka kam kaba bha ka dei ban long kaba la pynshong nongrim ha ka hok. Ka jingsynshar ïa ki kompeni ka dei ban long kaba la pynshong nongrim ha ka jinglong ba janai,” ka la ong.
Ka Tip Kur Tip Kha, ha kaba ka Myntri ka la pynpaw ïa ka jingdonkam jong ka imlang sahlang, ki jingïadei, bad ka jingkitkhlieh ha ka imlang sahlang ha ka khaii pateng. “Ka kamai kajih ha ka pyrthei mynta ka dei ban pynshong nongrim ha ki jinglong ba kordor jong ka thaiñ bad ka jinglong briew. Kane kam dei shaphang ka jingkyntait ïa ka jingiaid ki kam ha kylleng ka pyrthei hynrei ban pynlong ïa kaba kynthup lang bad kaba lah ban neh,” ka la bynrap.
Shuh shuh ka la ban jur sa ïa ka kyntien kaba ong “Ka Bhalang Ka Imlang”, kaba la ithuh ïa kane kum ka nongrim na ka bynta ka jingpynneh pynsah bad ka jingroilang, kaba ïadei bad ka khubor jong ka roi ka par kylleng ka pyrthei jong ka India kum “Kawei ka Pyrthei, kawei ka Longïing” bad ka “Vasudhaiva Kutumbakam.
Ka la ong ruh, ba ym don kano-kano ka kam kaba lah ban jop ha ka imlang sahlang ka bym seisoh. Kaei kaba pynmyntoi ïa uwei kam dei ban pynsniew ïa uwei pat.
Ka Myntri ka la kren ruh halor ka Mei-Ramew – Ki Ryngkew Ki Basa, da kaba pynpaw ïa ka jingsngewtynnat shaphang ka jingsngewkhia ka mariang, da kaba kdew ïa ka jingshem jong ka ha ka jingwan na Guwahati sha Shillong. “Ka lyer kaba khuid, ki sawdong-sawkun kiba jyrngam bad kane ka jingburom ïa ka mariang ka dei kaba ktah bha ïa ka mynsiem.” la bynrap ka Myntri.
Ka Myntri ka la ong ruh, ba kine ki jinghikai jong ki Khasi kim dei tang kiba don jingmut ha ka kolshor, hynrei ki long kiba thikna bad kiba jylliew na ka bynta ka jingpyrkhat ha ka liang ka ïoh ka kot ha kane ka juk ba mynta.
