Nongstoiñ, Naitung 11
Ha ka Sngi Thohdieng jong ka taïew da ki spah ngut paidbah nongshong shnong jong ka thaiñ Kyrshai-Ukiam kynthei bad shynrang jong ka khappud Meghalaya bad Assam hapoh ka lama jong ka Assam, Meghalaya Joint Protection Committee ki la wan ban aiti ïa ka dorkhas sha ka sorkar lyngba u Deputy Commissioner ka West Khasi Hills ban dawa ba ka Sorkar Jylla lyngba u Myntri Rangbah, Conrad K. Sangma ka dei ban sngap ïa ka jingud jingnam jong ki paidbah ba ka dei ban pynsangeh noh shisyndon ïa ka jingthmu ban pyntrei ïa ka Kulsi Hydro Project ha katei ka thaiñ.
U President jong ka Assam, Meghalaya Joint Protection Committee, Bah Albert Nonglang ha ka jingdon lang ruh u Rajani Boro kum Adviser ka Committee haba kren ha ki lad pathai khubor hadien ka jingleit ïakynduh ïa u DC u la ong ba na ka liang ki paidbah jong ka thaiñ Kyrshai-Ukiam kaba hap hapoh ka khappud ka Meghalaya bad Assam hadien ba la ïohi ha ka 2 tarik u bnai Jylliew 2025 ba ki ar ngut ki Myntri Rangbah ka Jylla Meghalaya bad Assam ki la pynlong ïa ka jingïalang hapoh nongbah Dispur, bad katkum ka jingmih ha ki lad pathai khubor la ïohi ba na ka liang jong ki, ki la dep ban ïakren sngewthuh jingmut ban pyntrei ïa kane ka project.
U Bah Nonglang u la ong ruh ba kane ka projek kam dei shuh kaba dang thymmai bad lada ym bakla da ki phew snem mynshuwa ka la ïaid ha kaba ka Brahmaputra Board ha kato ka por ka mut ban pyntrei hynrei da ka jingïakhih lane pyrshah jong ki paidbah ka la sangeh noh.
Shuh shuh ha ki snem 2016 ka la wan biang kane ka projek ha kaba ki ophisar bad ki nongmihkhmat ki kwah ïa ki paidbah ban pdiang ïa kane ka projek hynrei la pynlong biang ïa ka jingïakhih bad ka la sangeh noh.
Hynrei dei tad ka 2 tarik u bnai Jylliew 2025 ba ki ar ngut ki Myntri Rangbah jong ka Jylla Assam bad Meghalaya ki la pynpaw, kumta kum ki paidbah ki pynpaw ïa ka jinglynngoh ba balei haba ki nongmih khmat ha baroh shi katta ki la ïohi ïa ka jingpyrshah kaba na ka por sha ka por hynrei haduh mynta ki khlem sngap lane pynsangeh noh shi syndon ïa kane ka projek kaba la thmu ban pyntrei kam ha kato kajaka .
Kumta na ka liang jong ki paidbah ki wan ha kane ka sngi ban ïakynduh bad aiti ïa ka dorkhas lyngba u Deputy Commissioner ka West Khasi Hills ba un pynpoi ïa katei ka dorkhas sha u Myntri Rangbah jong ka Jylla u Conrad K.Sangma, khnang ba u Myntri Rangbah ai noh ïa ka rai lane ka jingpynshai sha ki paidbah ba ïa katei ka projek dei ban pynsangeh noh shi syndon khnang ba ki paidbah kiba shong ba sah ha katei ka jaka kin ym don shuh ka jingsngew artatien, ong u Bah Nonglang.
U la ong ruh ba lyngba kane ka dorkhas kaba kum ki paidbah ki wan ban ai ka sorkar ka dei ban shah shkor ïa ka jingud jong ki paidbah bad ka dei ban pynsangeh noh shisyndon ïa katei ka projek.
