Shillong, Naitung 11
Ka kynhun ïalehkai phutbol jong ki shynrang jong ka India ka la hiar sha ka kyrdan kaba rit tam ha ki khyndai snem namar ba ka la hiar haduh hynriew kyrdan kata sha ka kyrdan kaba 133 ha ka kyrdan ba khatduh jong ka FIFA kaba la pynmih mynta u bnai Naitung 2025, namar ka jingshah rem arsien ha u bnai Jylliew.
Ka India ka la shah rem noh ha ka Thailand da 2-0 kol ha ka jingïakhun hapdeng ki ri ka pyrthei ha ka 4 tarik u Jylliew, ha shwa ba kan mad ïa ka jingshah rem ha ka Hong Kong kaba kham poh kyrdan (0-1 kol) ha ka jingïakhun ïa ka Asian Cup qualifying round, kaba la pynlong ïa u coach rangbah Manolo Marquez ban ïakhlad noh bad ka All India Football Federation (AIFF).
Ka sien kaba khatduh ba ka kynhun ïalehkai jong ka India ka la ïoh ïa ka kyrdan kaba kham sniew ka dei ha u bnai Nohprah 2016 ha kaba ka la don ha ka kyrdan ba 135. Ka kyrdan kaba bha tam jong ka India ka long ha ka kyrdan kaba 94 ha u bnai Rymphang 1996. Ka kynhun jong ka India mynta ka don 1113.22 ki ‘rating points’, kaba hiar na ka 1132.03 kiba ka don ha ka kyrdan kaba mynshwa. Ka India mynta ka don ha ka kyrdan kaba 24 napdeng ki 46 tylli ki ri Asia (AFC) – kaba la lamkhmat da ka Japan (ha ka kyrdan ba 17).
Ka jingshah rem pyrshah ïa ka Hong Kong ka la buh ïa kane ka kynhun ha ka jingeh ha ka jingïakhun jong ka ban rung sha ka Asian Cup 2027, ha kaba ka India ka don ha trai duh ha ka kynhun ka miej ïalehkai da kaba ïoh tang shi poiñ na ki ar tylli ki jingïakhun. Dei tang ki kynhun kiba jop kiba lah ban rung bad shah jied, bad ka India ka don ïa ki jingïalehkai kiba eh ban wan, kita ki long pyrshah ïa ka Singapore (ha la ïing bad shabar), ka Bangladesh (shabar) bad ka Hong Kong (ha la ïing).
Hadien ba ka la pynlut ïa ka por ha ka snem 2024 baroh kawei khlem da ïoh jingjop, ka India ka la shah pynhap noh na ka jingïakhun sha ka FIFA World Cup, ka India ka la jop tang kawei na ki 8 tylli ki jingïalehkai ba la dep hapoh ka jingïalam jong u Marquez, ka jingjop kaba marwei kadei ha ka jingïalehkai pyrshah ïa ka Maldives ha u Lber.
Mynta u snem, ka India haduh mynta ka la ïakhun saw tylli ki jingïalehkai, ha kaba na kine ka la jop kawei, ïakhaid kawei, bad shah rem arsien. Ka jingmih kaba sniew (poor results) bad ka jingbym lah ban thep kol ka la pynlong ïa u kapten barim bad u rangïalehkai ba pawnam u Sunil Chhetri ban wanphai biang sha ka kynhun hynrei kata ruh kam shym la lah ei-ei ban kyntiew ïa ka kynhun, lane ïa ka jingthep kol jong ka.
Ka jingïakhun ban wan jong ka India kaba la buh por ban ïakhun ka long ka jingïalehkai shabar pyrshah ïa ka Singapore ha ka wat kaba lai jong ka Asian Cup Qualifiers ha u bnai Risaw.
Ka Argentina, ka lahduh ha ka pyrthei, ka dei kaba lamkhmat ha ka thup kyrdan jong ka FIFA baroh kawei, bud sa ka Spain, France, England, Brazil, Portugal, Netherlands, Belgium, Germany bad ka Croatia.
