Shillong, Naitung 11
Ka kynhun jong ka Bharatiya Janata Party (BJP) hapoh ka jingïalam u President, Rikman G. Momin, u Myntri Sorkar Jylla, Bah A.L. Hek bad u nongaiktien ba rangbah ka seng, Bah Mariahom Kharkrang, ka la ïakynduh ïa ki heh ophisar ka North Eastern Institute of Ayurveda & Homeopathy (NEIAH) ban ïakren halor ki jingeh ba ki samla pule ki ïakynduh.
Ka jingeh kaba hakhmat eh ba la pynpaw da ka kynhun ka long halor ka jingduna jong ki nonghikai, khamtam kito kiba la pynskhem ha ka kam.
Ha kajuh ka por, ka kynhun ka la pynpaw ïa ka jingdonkam kyrkieh ban pyndap ïa ki kam (permanent) ha katei ka shlem treikam, ha kawei ka liang kaba la long ka jingeh kaba khraw ïa ki samla pule.
Na ka liang u Director ka NEIAH u la pyntip sha ka kynhun ba la pynlong ïa ki ‘Interview’ na bynta ki nonghikai kontrak, bad la jied ïa ki kyrtong.
Ha kajuh ka por, u la pyntikna ba shen yn sa pyndap noh ïa ki kam ban pynskhem pura (permanent), ha kaba la khmih lynti ban ïoh ïa ka jingmynjur hapoh shi bnai.
Ka kynhun ka BJP kynthup ïa u Myntri, Bah A.L. Hek, ka la kular ban buddien ïa kane ka kam na ka tnat treikam ka Sorkar Pdeng ban pyntikna ha ka ban pynbeit noh kloi ïa ki jingeh jong ki samla pule.
Shuh shuh katei ka kynhun ka BJP ka la kular ïa ki heh ophisar ka NEIAH ba kan ai ka jingkyrshan da kaba ban jur ïa ka jingangnud jong ka seng ban pyntikna ba ki shlem pule ka Sorkar Pdeng ha ka Jylla kin treikam ha ka rukom ba beit ba ryntih, khnang ba ki samla pule kin kynjoh ïa ka jingjop kaba pura jong ki.
