Shillong, Naitung 11
Ki pulit ka jylla ha ka janmiet jong ka 11 tarik u Naitung 2025 kim shah shuh ïa ki paidbah ban rung bad leit kai shapoh Nan Polok namar ba ka Nirmala Sitharaman kaba dei ka Myntri Tnat Pla Tyngka jong ka Sorkar Pdeng ka la mut ban wan ïuhkjat sha katei ka jaka.
La sakhi ba ki pulit ki la ap pahara bha ha shilynter ka surok bah naduh surok Pine Wood Hotel ter-ter shaduh jaka rung ha Nan Polok. La sakhi ruh ba ka Nan Polok naduh ka por 3 baje nohphai sngi ka la jar-jar bad ym don briew iwei ruh, namar bym shah shuh ban rung shapoh.
Ïa ka Nan Polok ha ka Sngi Thohdieng la sdang ban plie naduh dangstep bad la buh pat ba ha ka por 3 baje nohphai sngi yn khang bad ym shah shuh ïa ki paidbah ban rung shapoh, namar ka Myntri jong ka Sorkar Pdeng kan wan ïuhkjat ha katei ka jaka.
Ka Myntri ka la wan poi ha Nan Polok ha ka por 4:30 eiei janmiet ban leit ïaid kai shapoh Nan Polok ryngkat ka jingsynranlang ka Deputy Commissioner ka East Khasi Hills District ka Kong Rosetta Mary Kurbah, ki Majistor, ki heh Pulit nalor kiwei-kiwei de.
Ka Myntri hadien ba ka la poi ha Nan Polok ka la ïaid kai ban peit ïa ki jaka ba itynnad, namar ka jinglong itynnnad ki jaka, nalor kata ruh ka jingdon ka um shyngiar bad kiwei-kiwei de. Kum ban shu kdew hangne ba ka Myntri ka Sorkar Pdeng, ka Nirmala Sitharaman ka la wan sha Nongbah Shillong ha ka Sngi Balang ban plie paidbah ïa ka Ïew Polo Commercial Complex.
