Imphal, Naitung:
Ki jingbteng jong ki jingleit khynra lehnoh, ki la pynlong ïa kiba bun ki dkhot jong ki kynhun lehnoh ba kin shahkem bad ha kajuh ka por la ïoh ruh ban kurup ïa ki tiar siat bad pynbthei kiba bun ha ryngkat kiwei pat ki tiar pyndonnkam.
Ki bor pahara jong ka Manipur ki la pynlong ïa ki jingkhynra kiba bun ha kylleng ka jylla ha ka 9 bad 10 tarik u Naitung, ha kaba kane ka la pynlong ïa ka jingshahkem jong ki dkhot ba ehrang jong kiba bun ki kynhun lehnoh kiba lka shah ñiew beaiñ bad ïoh ruh ban kurup ïa ki tiar siat bad kiba bun kiwei pat ki tiar.
Ha ka 10 tarik Naitung, ka jingkhynra lang ha Phougakchao-Ikhai Awang Leikai, Bishnupur district, ka la pynlong ban ïohkem ïa uwei u dkhot jong ka kynhun PREPAK (PRO) kaba la shah ñiew beaiñ ïa uba la tip kyrteng kum u Sarangthem Gobin Meitei ba la tip ruh da ka kyrteng kum u Maru (36), uba dei u nongshong shnong jong kane ka juh ka shnong. Ha ka jingkhmih bniah la ïoh ban kurup na u ïa ka Mobile Phone kaba don ïa ka Sim Card jong ka Airtel.
Ha kane ka juh ka sngi ki pulit ka Manipur ki la ïoh ban kem ïa uwei u dkhot ba treikam bha jong ka kynhun KYKL (SOREPA) na Umathel Bazar kaba don ha Kakching distrik. Une uba shahkem u dei uba la tip kyrteng kum u Mayanglambam Ranjit ba la tip ruh da ka kyrteng kum u Premchand (44) u dei uba na ka shnong Umathel Makha Leikai.
Ha kajuh ka por, ha ka 9 tarik, Naitung, ki bor pahara ki la kem ïa uwei u dkhot ba shimet jong ka Lance Corporal jong ka KYKL (SOREPA) na ka thaiñ Mayang Imphal Thana Mamang Leikai ha Imphal West distrik. Une u briew uba la shah kem u dei uba la tip kyrteng kum u Maibam Basanta Meitei uba la tip ruh da ka kyrteng kum u Boy (40) uba shong ba sah ha Wabagai Thambal Chingya ha Kakching distrik.
