Shillong, Naitung 11
U President jong ka Tour Guide Association of Meghalaya Sohra Unit, Bah Gilbert Khongsit, u la ong ba naduh ba shah pynïap u Raja Raghuvan -shi ki la don ki nongjngohkai pyrthei kiba la donkam ïa ki nongïalam lynti ne ‘guide’ haba ki wan kai sha thaiñ Sohra.
Haba ïakren bad u Bah Gilbert, u la ïathuh ba katkum ka jingtip jong u ki nongjngohkai pyrthei haba ki wan sha ki thaiñ Sohra ki la sdang ban phah ïalam da ki nongïalam lynti.
U la ïathuh ba mynta u bnai ki nongjngohkai pyrthei ki kham duna ym dei na ka jingshah pyn-ïap u Raja Raghuvanshi ha ka Sonam Raghuvan-shi kaba dei ka kurim jong u lem bad ki paralok jong ka, hynrei ka dei namar ka jingdon ki jingshlei um, ka jingbthei liengsuiñ bad bun ki thma.
U la ïathuh ba mynta u bnai ki nongïalam lynti ki kham ïoh ban ïalam ïa ki nongjngohkai tang ha ki Sngi Thohdieng bad Sngi Saitjaiñ katba ha ki Sngi Pohïa ka kam duna.
Shuh-shuh, u la pyntip ba lada ki nongïalam lynti ki ïoh beit ban ‘call’ na ki nongjngohkai pyrthei ki kham im namar lada ki sah shi taïew ha jaka ban shim T.1500 shi sngi ki la pynduna noh haduh T.1000 shi sngi.
Kumjuh, lada ki nongjngohkai ki kwah ban ïaid kjat sha ki jaka jngohkai ki la pynhiar noh ïa ka dor tang T.1200. U la pyntip ba lada kito ki nongjngohkai ki la lap ba ki nongïalam lynti ki kham biang ban ïalam kai ma ki pat ki ai number phone sha kiwei pat ki paralok kiba thmu ban wan sha Sohra. Nangta u la pyntip ba lada duna kiba wan kai mynta u bnai u don jingkyrmen ba ha uwei u bnai kin bun kiba wan kai.
Namar kata, u la kyrpad ïa ki nongïalam lynti ba donkam ban don ha ka seng kumba don ma u ha ka synjuk khnang ban buh da kajuh ka dor ïa ki nongjngohkai pyrthei bad kan wanrah jingshngaiñ ïa ki briew kiba nabar haduh ba kin da leit phai suk.
U la pyntip ba ka Tour Guide Association of Meghalaya Sohra Unit ka dang don 14 ngut kiba dkhot ba shitrhem.
Kum ban shu pynkynmaw, ka jingshah pynïap ïa u Raja Raghuvanshi sha riat Wei Sawdong ka la pynduh mynsiem ïa ki paidbah ha ka jylla namar ka jingmih ki jingkynthoh ba har rukom hynrei kane baroh la weng noh hadien ba ki pulit Meghalaya ki la ïoh kem ïa ka kurim jong u Raja ka Sonam Raghuvanshi lem bad ki paralok kiba shah kynnoh donkti ban pynïap ïa u Raja haba ki wan kai ‘honeymoon’ sha Sohra.
