Shillong, Naitung 11
Ka jingbym pat shah ban plie ïa ki border haat ha khappud ka Meghalaya bad Bangladesh kaba la neh mynta la shi snem kynthih naduh ba la khyllem ka Sorkar jong ka Sheikh Hasina ka la wanrah pynban ka jingduhnong ym tang ïa ki paidbah kiba sah ha khappud jong ka jylla hynrei wat ïa kiba sah sha shiliang ka Bangladesh.
Haba ïoh ban ïakren bad u Pa’iem Kynsai N Syiem uba dei Syiem ka Hima Bhowal, u la ïathuh ba naduh ba la khang ka Balat Border Haat kaba don ha Dangar mynta la shisnem kynthih ka ïoh ka kot jong ki paidbah ka la hiar bha.
U la ïathuh ba na ka liang ka Sorkar India ka la long kaba la kloi ban plie hynrei kim shym la plie na ka Sorkar Bangladesh bad lada slem ban plie ïa ka haat border kan sa buh jingeh shuh-shuh ïa ki paidbah kiba la shaniah na kane ka haat.
U la ïathuh ruh ba ym tang kane ka thaiñ kaba shah ktah hynrei kiwei ki thaiñ kiba don markhap ruh ki lah ban mad lang ïa kajuh ka jingeh. Kumjuh, u la pynpaw ruh ka jingsngewsynei namar ba ki mar rep kiba ju pynmih pisa hynrei mynta ki shu hap kai ha madan bad don ki mar rep kiba la pynïaid sha ïew Balat bad Mawsynram.
Shuh-shuh, u la pynpaw ba da ka jinghiar ka ïoh ka kot ka la ktah ïa ki paidbah jong kine ar tylli ki ri kat haduh ba wat ki nong Bangladesh haba la ban ka jingduk ki hap ban kiew sha India. U Pa’iem Kynsai u la ong ba lada dang bteng ka jingkhang ban ïadei-ïathied ïa ki mar India bad Bangladesh ha khappud kan buh jingma ïa ka jylla namar ki nong Bangladesh haba ki la ban ka jingduk ki hap ban kiew sha India.
La ïoh jingtip ba ym tang ïa ki border haat la khang ka Bangladesh hynrei ki bun jait ki mar ki mata ba ka Sorkar Bangladesh ka dang khang haduh mynta.
Kum ban shu pynkynmaw, ka jingkhang ïa ki border haat hapdeng ka India bad Bangladesh lyngba ka jylla Meghalaya ka dei naduh u bnai Nailar 2024 hadien ba ka Sorkar Sheikh Hasina kum ka Myntri Rangbah ka Bangladesh ka la khyllem noh.
