Mawkyrwat, Naitung 11
Ka Mawkyrwat Block Congress Committee lyngba ka Youth Congress Committee ha ka Sngi Thohdieng ka 11 tarik u Naitung 2025 ka la ïoh ban pynkup burom ïa ka samla Banrihun Lyngdoh Marshilong, ka samla kaba la khur ar tylli ki takma ksiar ha ka jingïakop ïakhun kti (Arm Wrestling) ba la pynlong da ka Kerala Arm-Wrestling Association ha Kerala.
Ha kane ka sngi la ïa donlang u Bah Kynpham V. Kharlyngdoh, President District Congress Committee, u Bah Andrias Kharkongngor, Secretary Mawkyrwat Block Congress Committee, u Bah Ribrensing Pariong, President Marshilong Congress Primary Unit, u Bah Kynsailang Lyngdoh, President Youth Congress Committee, Mawkyrwat Block, bad u Bah Gilbert Thongni, Myntri Shnong Marshilong.
Haba ai jingkren, u Bah Kynpham V Kharlyngdoh u la ai ka jongïaroh ïa ka samla Banrihun Lyngdoh Marshilong kaba la poi sha ka thong ka jingjop ha ka jingïakop ïakhun kti ha kaba ka la wanrah nam lyngba ka jingkhur haduh ar tylli ki takma ksiar.
Shuh-shuh u la kyntu ïa kane ka samla ba kan nangtrei shitom shuh-shuh ha ki por ban dang wan khnang ba kan nang kiew na kawei ka kyrdan sha kawei pat haduh ka International Level ruh.
Ka samla Banrihun Lyngdoh Marshilong ha ka jingkren jong ka la ïathuh ba ka jingjop jong ka ha kane ka jingïakop ïakhun kti ka dei lyngba ka jingai mynsiem naduh na ïing na sem, ka shnong ka thaw, ka distrik bad kumjuh ruh na ki para ba ïalehkai lang.
Ka la pynpaw ruh ka jingainguh ïa u Blei Nongbuh Nongthaw uba la ri la sumar ïa ka ha ki por baroh bad ai khublei ruh ïa baroh kiba ka don bynta ban kyrshan ïa ka la ka long lyngba ka pisa tyngka bad kumjuh ruh kiba ai mynsiem lyngba ki jingduwai.
Ka samla Banrihun Lyngdoh Marshilong ka pynpaw ruh ka jingaikhublei na ka bynta u Bah Aldous Wanniang, President Arm-Wrestling jong ka South West Khasi Hills District uba la kyrshan ha kane ka jingleit jong ka sha Kerala Arm-Wrestling.
