Shillong, Naitung 11
Ka Amanda Anisimova ka la thaw khana pateng da kaba pynliem ïa ka Aryna Sabalenka kaba wan nyngkong ha ka pyrthei da 6-4, 4-6, 6-4 ha ka Wimbledon Semi-final ban pynthikna ïa ka jaka jong ka ha ka phainal. Kane ka dei ka sien kaba nyngkong jong ka ban mih madan ha ka final jong ka Grand Slam. Ka jingjop jong ka Anisimova ka long ka jingpynshisha ïa ka jinglah ban ïakhun bad ka jingkut jingmut jong ka, khamtam haba pyrkhat ïa ka jingïakhun jong ka bad ka jingpang ‘depression’ bad ka jingtlot bad ym donbor shuh ban lehkai kaba la pynlong ïa ka ban sangeh noh haduh 8 bnai na ka jingïalehkai tennis ha u snem 2023.
Ha kane ka jingïalehkai, ka Sabalenka ka la lah ban lamkhmat noh ïa ka Anisimova ha ka jingïalehkai ba nyngkong jong ka set naduh kaba sdang, hynrei ka Anisimova ka la ïakhun pyrshah, da kaba lamkhmat arsien ïa ka Sabalenka da 3-1.
Ka Anisimova ka la pyllait saw tylli ki ‘break point’ ha ka jingïalehkai kaba hynñiew jong ka set ba nyngkong, katba ka Sabalenka ka la shim ïa ka kabu ban pyn-ïaryngkat ïa ka jingïakhun hadien ki ‘double fault’ ka Anisimova ha ka set ba ar.
Ka Anisimova ka la jop da 82% na ki poiñ ba nyngkong ha ka set kaba lai, kaba pyni ïa ka jinglah ban ïalehkai bha bad ka rukom lehkai khlaiñ bor jong ka.
Ka Anisimova kan ïakhun pyrshah ïa ka Iga Swiatek lane ka Belinda Bencic ha ka phainal jong ka Wimbledon, kaba wad ïa ka nam lahduh kaba nyngkong jong ka ha ka Grand Slam. Da kane ka jingjop, ka la ïoh ïa ka jingkular ba kan ïoh ïa ka kyrdan kaba hynñiew ha ka jingim jong ka bad ka la pynkhreh ban rung sha ka kyrdan ba san ba ha khmat eh lada ka jop ïa ka nam lahduh.
Ka jingïaid lynti jong ka Anisimova ban poi sha ka phainal ka long kaba phylla, haba pyrkhat ïa ka jingeh jong ka ha ka bor pyrkhat bad ka jingshah rem mynshwa jong ka ha ka jingïakhun ha ka Wimbledon ha u snem ba la dep. Ka jingjop jong ka ïa ka Sabalenka ka dei ka dak kaba kongsan ha ka jingim jong ka, kaba pyni ïa ka jingkiew bad jingkut jingmut jong ka kum ka nongïalehkai.
