Shillong, Naitung 11
Ka Data Yuk Society (DYS), kaba dei kawei ka kynhun ba la ithuh da ka sorkar, ha ka Sngi Thohdieng ka 11 tarik u Naitung 2025 ka la pynlong ïa jingïalang ai jinghikai ban pynphriang ïa ka khubor kum ka jinghikai bad pynkyndit thiah ïa ki briew ban ym ngop ha ki kam shah thok bad kiwei de ki kam sniew.
Ïa kane ka jingai jinghikai jong ka Data Yuk Society (DYS) la pynlong ha Seven Set Secondary School Shillong halor ka phang “Awaking You Digital safeguarding the feature empowering youth for Tomorrow.
Ka jingkiew sted ka technology, kaba la pynsuk ïa ki briew ha ki liang baroh, lem bad ka jingkharoi ki kam sniew lyngba ka jingstad technology, kaba ki briew ki ju sakhi na ka por sha ka por ba bun ki kam sniew ki jia, la ka long kum ka jingshah thok pisa, ki kam tuh kam thiem, da kaba ki pyndonkam da ki kor ki bor internet. Kumta na ka liang ka DYS ha kane ka sngi ka la pynlong ïa ka jingai jinghikai halor katei ka phang.
Haba kren sha ki lad pathai khubor, ka President ha kajuh ka por ka nongseng ïa ka Data Yuk Society (DYS) ka Menoka Naug Mahato, ka la ong ba ka jingpynlong ïa kane ka prokram ka dei namar ka jingïohi bad lap ba shibun ki briew ki shah thok ha ki kam pisa-pilaiñ bad ki tiar ki tar.
Ka la ong ba ha kane ka prokram ki la pynsngewthuh ïa ki briew ban long kiba husiar bha na ki kam shah thok lyngba ka juk technology ba mynta.
Nalor kata, ka la ong ba ka jingshah thok ym dei tang ïa ki briew ki bym nang bym stad hynrei wat kiba la nang la stad ruh bun sien ki shah thok.
“Ka long kaba donkam ban don ka jingïada ha kum kine ki kam, namar ka jingïada ka kham bha ïa ka jingsumar,” la bynrap ka Menoka.
Shuh-shuh, ka la ong ruh ba wat la ka long kaba eh ban pynïoh biang ïa ka pisa jong kiba la shah thok hynrei kaba kongsan ka dei ka jingshah ktah ha ka jingmut jingpyrkhat bad kumta ka thong ka long ba kumno ban pynbha biang ïa ka jingmut jingpyrkhat ki briew kiba la shah ktah.
