Imphal, Naitung:
Na ka jingbym sangeh jong ki kynhun pahara ban leit khynra sha kylleng ki jaka, saw ngut ki lehnoh jong ka kynhun Kangleipak Communist Party ba la shah ñiew beaiñ ki la shahkem namar ki kam dawa pisa. Kane ka jingshahkem jong kine ki lehnoh ka la long ha Bishnupur bad Imphal ha ka por ba ki pulit ki la pynlong ïa ka jingleit thwet lehnoh bakyrpang. Ha kane ka jingleit khynra, ki pulit ki la ïoh ban kurup ïa ki Mobile Phone bad ka pisa na kine ki lehnoh kiba la shahkem.
Kumba la ïathuh ka tyllong khubor ba la ïohlum halor kane ka jingjia, la ong ba ki pulit jong ka Manipur bad ki shipai pahara, ki la kem ïa kine ki saw ngut ki lehnoh ba ehrang jong ka kynhun Kangleipak Communist Party (People’s War Group), ha ka 8 tarik, Naitung, namar ka jingdonkti jong ki ha ki kam dawa pisa ha kylleng ki distrik.
Ïa ki arngut ki dkhot jong ka kynhun lehnoh la tip kyrteng kum u Laitonjam Ramakanta Meitei (34) na Imphal East bad u Thongam Herojit Singh (38) na Imphal West, kine ki la shahkem na ki thaiñ Utlou ha Bishnupur katba ki dang dawa pisa na ki nongshong shnong bad na ki nongkhaïi ha Nambol.
Ha kawei pat ka jingkhynra kaba kyrpang, la ïoh ban kem ïa u Thoudam Santosh Singh uba la tip ruh da ka kyrteng kum u Henthoiba (23) na Thoubal na Moirang Okshongbung, Bishnupur, namar ba u la dawa pisa na ki jaka pule kiba don ha Thoubal distrik. Na ka kti jong u la kurup kawei ka Mobile Phone bad kawei ka Card Aadhaar.
Uwei pat u dkhot ka kynhun lehnoh u dei uba la tip kyrteng kum u Potshangbam Jeet Meetei ba la tip ruh da ka kyrteng kum u Norjit (55) na Imphal West u la shah kem na Kekrupat, North AOC.
