Shillong, Naitung 13
Shi bynta ban pynkhreh ïa ka 39th National Games 2027, ka Shooting Association of Meghalaya (SAM) ka la pynlong ïa ki prokram jied nongïalehkai siat suloi ha kane ka nongbah.
Ïa kine ki jingpyrshang la thmu ym tang ban jied ïa ki nongïalehkai kiba tbit na ka bynta katei ka lympung ban wan, hynrei ban pynskhem ruh ïa ka Meghalaya kum kawei na kawei na ki jylla kaba lah ban sei ïa ki nongïalehkai siat suloi kiba kynsai ha ki lympung ïakop shabar jylla.
Ka 39th National Games ka dei ka lympung ïalehkai kaba paw hapoh ri India, kan lum lang ïa ki nongïalehkai kiba kynsai jong ka ri ha ki jingïalehkai bapher bapher na kylleng jong ka ri.
Na ka bynta ka Meghalaya, kane ka lympung ka ai ka lad kaba kongsan ban pyni ïa ka sap ïalehkai siat suloi.
Ki nongïalam katei ka synjuk ki don jingkyrmen kaba skhem ba kane ka prokram jied nongïalehkai kan ïarap ban sei ïa ki nongïalehkai kiba kynsai ha ka National Games.
“Ngi kut jingmut ym tang ba ngin ïashim bynta, hynrei ban leh bha ruh ha ka lympung ïalehkai hapoh ka ri,” la pynpaw u President ka SAM u Bah John F. Kharshiing.
“Ka jingthmu ba kongsan jong ngi ka long ban wad bad pynroi ïa ki sap ïalehkai naduh dang rit, bad da ka jingbei tyngka jong ngi ha ki prokram ai jinghikai bad ki jaka kiba biang, ngi khmih lynti ban jam shaphrang ha ka jingïakop siat suloi ha ka 39th National Games.” u la bynrap.
Ïa kane ka jingpyrshang la pynlong ha ka sngi Saitjaiñ ha ka nongbah Shillong ha kaba la wan shim bynta da ki nongshim bynta na Ri Bhoi, Jaiñtia Hills bad na East Khasi Hills districts ha ki jingïakop siat bapher bapher kiba kynthup ïa ka 10M, 25M, 50M bad ka 50M Rifle Prone. Kumjuh ha ka Sngi U Blei la wan shim bynta na West Garo Hills bad North Garo Hills ha kane ka jingpyrshang. Ïa kine lo prokram la pynlong ha Assam Regimental Centre, Shillong.
Ka rta jong ki nongshim bynta kiba la wan sha kane ka jingpyrshang ki long naduh 13 haduh 50 snem ka rta.
Kane ka rukom treikam kaba kynthup lang ka dei shi bynta jong ka jing-angnud kaba kham heh jong ka jylla ban kyntiew ïa ka jingsiat kum ka jingïalehkai bad ban sei ïa ki sap ba kynsai, ban pynthikna ïa ka jingïakhun kaba bteng ha ka madan jong ka ri,” la bynrap u Bah Kharshiing.
“Ka jingthmu jong ngi ka long ban pynmih ïa ka kynhun kaba khlaiñ kaba lah ban ïakhun ha ki kyrdan kiba hakhlieh duh bad ban wanrah ïa ka burom jong ka jylla Meghalaya,” u la bynrap.
U la pynksan shuh shuh ba ki jingpyrshang ki long kum ka rukom jied bad kum ka jaka ai jinghikai, kaba ïarap ïa ki nongïalehkai ban pynjanai ïa la ki sap ba ki don, ban pynïahap bad ki jaka ïalehkai, bad ban ïoh ïa ka jingshemphang kaba kordor hashwa ban shim bynta ha ka National Games.
“Ka National Games ban wan kan long ka thong ka jong ngi ban pynshisha ba ka Meghalaya ka dei ka ri kaba khlaiñ ha ka kam siat suloi. Ngi dang trei khlem sangeh ban pynthikna ba ki nongsiat jong ngi kin long kiba la pynkhreh bha, ha ka met ka phad bad ka jingmut jingpyrkhat khnang ban ïoh bat ïa ki kyrdan ba hakhlieh,” la bynrap biang u Bah Kharshiing.
Katba ki jingpynkhreh ki nangjam shaphrang, ki jingpyrshang ha ki jingsiat suloi ki long ka sienjam kaba nyngkong ha ka buit treikam kaba bniah na ka bynta ban pynlong ïa ka jylla kaba jop ha katei ka lympung ïalehkai jong ka ri.
