Nongstoiñ, Naitung 13
Ka Khasi Students’ Union (KSU) Lyngngam Hynneng Brei Area Unit ka la dawa ïa ka Sorkar Jylla lyngba ka tnat ba dei peit ba kan shimkhia ban pynbiang noh ïa baroh ki jingdonkam hapoh ka Shallang Dispensary Veterinary.
U samla Anslem Ryntong, President ka KSU Lyngngam Hynneng Brei Area Unit u la ong ba halor kane ka bynta, ha kine ki khyndiat sngi ba la lah, ka seng ha ka jingdonlang ruh ki nongkitkam ka KSU West Khasi Hills bad Mawshynrut Circle ka la leit ban ïakynduh ïa u District Veterinary Officer ka West Khasi Hills bad aiti ruh ïa ka jingthoh ban kyrpad ban shimkhia lem ïa kane ka bynta.
Shuh shuh u la ong ruh ba kaei kaba pynlong ïa ka seng ba kan leit ban ïakynduh ka long halor ka jingbym biang bad ka jingduna jong katei ka tnat kaba don ha katei ka thaiñ. U la ong ruh ba kumba long mynta ha ka thaiñ 90 persen na ka 100, ki paidbah ki im ha ka rep ka riang, ka jingri jingdup bad kine ki dei ki jingmih kiba ïarap lada don kino-kino ki jingjia, ki jingpang kiba kyndit ha ki ïing ki sem. Lyngba kine ki jingri ki briew ki lah ban die lane buh bynda bad shim ram na kino-kino ki briew hynrei ha kine ki por ba mynta ka jingkylla jong ka mariang ka pynlong ïa kine ki mrad bunsien ki ïoh ïa ki jingpang har-rukom ha kaba ym lah ban sumar ïa ki.
U la ong ruh ba ka jingdon jong ka tnat dispensary veterinary ha ka jingshisha kan long ka jingïarap ïa ki paidbah nongrep hynrei la pyrshah ban kyrpad ban leit shim ïa ki dawai na ka bynta ki jingri jingdup, kaba sngewsih ba ym don mano-mano ba ai dawai namar mynta ha kane ka tnat ka don tang u nongap (chowkidar).
U samla Anslem u la ïathuh ruh ba mynshuwa la don u doktor hynrei une u doktor ruh u shim shuti bad katkum ka jingïoh jingtip haduh mynta um shym la wan trei shuh bad la shu peit da uwei u doktor na Riangdo bad kane ka shem jingeh ïa u ban peit ïa ar tylli ki dispensary bad ka pynlong ban khang beit namar ym don briew ban trei. U la bynrap ruh ba ha kine ki sngi ba la lah ha kane ka dispensary u la don u veterinary dispensary assistance hynrei une u ruh la kumba ar taïew mynta u la shah pynkynriah kam noh.
“Kane ka jingbym don ïa ki nongtrei ka dei ka jingduhnong kaba khraw ïa katei ka dong bad ka thaiñ, nangta ha katei ka dispensary tang ka signboard ruh kam don, kaba ar ka um kam don hap ban leit tong na sha jngai bad kaba lai bad kaba kongsan ka dei ka jingpynpoi ïa ki dawai (supply) bad ha ka por ba ka seng ka leit ban jurip ïa katei ka dispensary la lap ba ka duna bha ka supply bad ha ka jingkynduh ïa u District Veterinary Officer ruh, la pynpaw ba ka dawai ka duna bha katba ka jingdawa ka bun hynrei ka jingpoi ki dawai ka duna,” ong u samla Anslem.
U samla Anslem u la ong ruh ba ka KSU ka dawa na ka Sorkar ba ka dei ban pynbiang noh ïa ki jingduna ha katei ka dispensary namar kaei ka jingmut lada don ïa ka veterinary dispensary tang ka ïing (building) hynrei ki nongtrei kim don.
Shuh shuh u la ong ruh ba ka KSU ka kyntu ïa ka Sorkar ban phah noh ïa u doctor, kumjuh ïa u veterinary assistant ban ïarap ïa u doktor bad kumjuh ban pynbiang ïa ki dawai ki dashin khnang ba ka jingsumar ïa ki jingri ki jingdup kan long kaba ïaid beit ïaid ryntih, nangta ka um dei ban pynbiang ha katei ka tnat.
Ha kajuh ka por u samla Anslem u la ong ruh ba ka KSU ka kyntu ïa u MLA ka thaiñ ban shimkhia lem na ka bynta ka jingmyntoi jong ka dong bad ka thaiñ.
