Shillong, Naitung 13
U MDC ka Tura, u Bernard N. Marak u la thoh sha u Executive Member (EM) ka GHA-DC ba peit ïa ka tnad khajna, u Grahambell A. Sangma halor ka mat ba ïadei bad ka jinglum khajna be-aiñ khlem ka jing-mynjur jong u Lat ka Jylla.
“Kumba phi lah ban kynmaw, ha ka Dorbar kaba 13 jong ka GHADC kaba la long ha u Lber ba la dep, phi la jubab ïa ka jingkylli jong nga kaba 12, d, ba ka khajna (Tra-ding for Non – Tribal and Tribal Trading License) ba la pyntreikam da ka tnad treikam jong phi ka long kaba khlem ka jingmynjur jong u Lat ka Jylla kumba la bthah ha ka ‘Paragraph 8’ jong ka Riti Synshar ka ri India,” ong u Marak ha ka jingthoh sha u EM.
Na ka liang u MDC u la buh jingkylli ba ha ka bor jongno ba ka tnad treikam ka bteng ban lum ïa kine ki khajna, khlem da ïoh ïa ka jingmynjur ba donkam katkum ka riti synshar (wat ïa ki ‘riewlum) – kaba pynlong ïa ka rukom lum khajna baroh kawei kaba be-aiñ, bad ka bym ïahap katkum ka riti synshar.
“Kane ka jingpyndonkam bakla ïa ka bor kaba paw pyrthei ka pynmih ïa ki jingsngewkhia kiba jur ha ka liang ka aiñ, khamtam haba ka GHADC kam shym la lah ban pynkhuid ïa ka tulop kaba sahteng la palat 40 bnai jong ki nongtrei jong ka, wat hapdeng ka jinglum khajna lyngba kine ki khajna ki bym ïoh jingbit,” u la ong.
U Marak u la ong ruh ba ka jingbteng ban pyntreikam ïa ki khajna bym pat ïoh jingmynjur ym tang ba ka pynkheiñ ïa ki kyndon ka riti synshar hynrei ka pynpaw ruh ïa ka GHADC ban shah pynngat ha ka aiñ namar ka jingleh bakla ha ka liang ka pisa-tyngka.
Na ka liang une u MDC u la dawa ruh ïa ka jingpynshai ba mardor ba ha kano ka nongrim aiñ ba ka GHADC ka la bteng ban lum khajna khlem ka jingmynjur jong u Lat ka Jylla.
“Balei phim dei ban shah pynngat ha ka aiñ halor ka jingpynkheiñ ïa ka ‘Paragraph 8’ jong ka Khyrnit ba 6? Kaei ka jingpynshisha kaba don ban lum ïa ka khajna ba khlem jingbit katba ki nongtrei ka GHADC ki sahkut khlem jingsiew la palat 40 bnai?,” la pan jingpynshai u Marak ha ka jingthoh.
Shuh shuh u la bynrap, “Lada ym ïoh ka jubab kaba sngewhun hapoh 10 sngi, kan pynbor ïa nga ban ïaid ïa ka lynti jong ka aiñ ban pynngat ïa phi ha ka jingkitkhlieh na bynta kine ki jingpynkheiñ. Ka jingbteng ban lum khajna be-aiñ bad ka jingpynïaid bakla ïa ka pisa kam lah ban ïaid khlem ka jingpeitngor. Nga khmih lynti ïa ka jubab kaba kloi ban pynbeit ïa kine ki jingeh.”
“Lada ym lah ban leh kumta kan pynlong ïa ka jingtuklar jong ka aiñ ban pyntikna ba ka GHADC ka treikam hapoh ka saiñdur jong ka riti synshar bad pynneh ïa ki jingkitkhlieh jong ka ha ka liang ka pisa-tyngka,” la ong u Marak.
