Delhi, Naitung 13
Kawei ka samla pule jong ka Delhi University kaba dang 19 snem ka rta kaba la jah rngai hynriew sngi lynter bad ïa ka metïap jong ka pat la lap na ka wah Yamuna.
Katei ka samla pule kaba la tip kyrteng kum ka Sneha Debnath, ka dei ka nongshong shnong jong ka Jylla Tripura. Ki bahaïing jong ka ki la ithuh ïa ka met jong ka, la ïathuh ki pulit.
Ïa ka met jong katei ka samla ki pulit ki la phah na ka bynta ban leh ïa kaba donkam (Auto-psy).
Ki bahaïing jong katei ka samla ha Tripura ki la wad ïa ka da ka jing-sngew lyngngoh hadien ba ka la jah rngai hynriew sngi. Ka la shim kali kamai ban leit sha North Delhi’s Signature Bridge ha ka 07 tarik u Naitung.
Ki pulit ki la ïathuh ba ka Sneha ka la iehnoh ïa ka jingthoh da ka kti, kaba pyni ïa ka jingthmu ban ïap, da kaba pynïap ïalade.
Kam shym la sngewsih ïa ka jingpule jong ka, la ïathuh ki tyllong khubor na ki pulit, da kaba bynrap ruh ba ka daw jong ka jingsngewsih jongka, ka dei kaba ïadei bad ka iing ka sem jong ka.
Ha ka jingtohkit, ki pulit ki la buddien ïa ka ïaid ka ïeng jong ka Sneha lyngba ka jingpeitngor ba stad (technical surveillance) bad ki la pynthikna ïa ka jaka ba ka ïaid khatduh kaba la tip kum ka Signature Bridge.
Ki pulit ki la lap ïa ka metïap jong kane ka samla na ka wah Yamuna hajan ka lynti ïaid liengsuiñ ha Geeta Colony, kaba don kumba 10 kilometre sharum na ka jingkieng Signature ha ka Majnu Ka Tila kaba don shatei lam mihngi jong ka Delhi.
“U nongñiah kali kamai uba la pynhiar ïa ka ha katei ka jaka u la pynskhem ïa katei ka jingong. Katto-katne ki nongpeitkai ki la ïathuh ba ki la ïohi ïa kawei ka khynnah kynthei kaba ïeng ha ka jingkieng bad hadien ka la jah noh na katei ka jaka,” la ong ki pulit ha ka kyrwoh.
La pynlong ïa ka jingkhynra da ka jingïarap jong ki shipai National Disaster Response Force (NDRF) bad ki kynhun pulit. Ki la leit khynra lyngba ki jaka naduh shatei lam mihngi jong ka Nigam Bodh Ghat jong ka nongbah Delhi haduh Noida ha Uttar Pradesh.
Ki pulit ki la ïathuh ba ka Sneha ka la phah email bad ki khubor sha ki paralok ba jan jong ka, ha ka por mynstep jong ka 7 tarik u Naitung 2025, bad ki paralok jong ka ki la ïathuh ha ki nongtohkit, ba ka la shah pynthut bad shah pynshitom ha kine ki khyndiat bnai ba la dep.
Ki bahaïing bad katto-katne ki paralok jong ka ki la pynpaw ïa ka jingsngewkhia halor ki jingtei ba peitngor ha ka thaiñ Signature Bridge.
Ki la kynnoh ruh ba ym don kawei ruh na ki CCTV ha ka jingkieng Signature ne hajan katei ka jingtei kaba treikam ha ka por ba ka jah.
