Washington, Naitung:
U President ka US- u Donald Trump ha ki khyndiat Sngi ba la leit, u la kynnoh ia u Presdient ka Russia- u Vladimir Putin, ba u pynkit pap ia ka US halor ka thma jong ka Russia bad Ukraine bad kumta u Trump u la pynpaw ba ka US kan sa phah biang ia ki tiar thma sha ka Ukraine khnang ba kan lah ban ïada ialade ha ki por jong ka jingleit thombor jong ka Russia.
Ka jingkren jong u Trump ka pynpaw ïa ka jingsngewsih kaba jur jong u, ïa u nongïalam ka Russia halor ka thma kaba jur bha kaba ka Russia ka la bteng ban leit thombor ia ka Ukraine la lai snem shiteng mynta.
“Ngi ioh shibun ki jingkynthoh bad jingpynkit pap ba la pharep ia ngi da u Putin, lada phi kwah ban tip ia ka jingshisha”, la ong u Trump ha ki nongthoh khubor ha ka jingialang jong ka kynhun Myntri ha ka White House.
U Trump u la pynpaw biang ba um sngewtynnat satia ïa u Putin namar ba ka jingïakren phone jong ki ha ka taiew ba la dep kam shym la wanrah kano-kano ka jingmyntoi halor ka jingïateh kular ban ïasuk noh bad ka Ukraine, kaba u President jong ka US u la pynbor naduh ba u la wanphai biang ha ka bor synshar ha une u snem.
Haba kylli halor ka jingsngew jong u ïa ka aiñ ba la tyrwa da ka Senate na ka bynta ban pynjari shuh shuh ïa ka Russia, u Trump u la ong “Nga dang peit bniah bha ïa kane.”
Ka jingkynthoh jong U Trump ïa u Putin, ka long ruh tang shisngi hadien ba u la ong ba un sa phah shuh shuh ïa ki tiar ïakhun sha ka Ukraine, wat haba ka US ka la pynbna ha ka taiew ba ladep ba kan pynsangeh noh ïa ki katto-katne ki jingshalan tiar ïakhun shabar ri.
U Trump, u la kular ruh ban phah mardor sha ka Ukraine ia ki 10 tylli ki Patriot Interceptor, kiba long ki tiar ban ïakhun pyrshah ia ki ‘namding.
U la kyntu ruh ïa u heh jong ka Pentagon, u Pete Hegseth ban pynbor ïa ki kontraktor ïada ri ban pynkiew ïa ka jingpynmih ïa ki tiar ïakhun.
