Washington, Naitung:
Ka tnat kam poh iing jong ka US, ha kane ka kynti ka la wanrah da ka prokram ai jinghikai sha la ki paidbah nongshong shnong halor ki jingma kiba ap ia ki lada ki leit- ki wan sha ka ri Iran ha kum kine ki sngi ba ka jingiadei hapdeng ka Iran bad ka US kam biang shuh.
Kumta, la ong ba ka Lamphang jong ka tnat kam poh iing ka US, ka Tammy Bruce, ka la maham tyngeh ia ki paidbah nongshong shnong ka ri America baroh kawei ba ki dei ban kiar na ki jingleit sha katei ka ri marjan.
Haba ai jingkren sha ki lad pathai khubor ha ka Sngi Palei, ka Bruce ka la pynshai sha ki paidbah jong ka ri ba kim dei ban shim sting halor kane ka jingmaham na ki bor pyniaid ka ri, namar lada don kino-kino ki jingeh ba ki iakynduh lane ki shah bat haba ki leit poi sha katei ka ri, kan long kaba eh ia ka US ba kan tuklar bad kit khlieh na ka bynta jong ki.
Namar ka la ong ba ka tnat ka pynbna ïa ka jingpynsngewthuh paidbah kaba thymmai ban maham ïa ki nong America, khamtam ïa ki nong Iran, shaphang ki jingma kiba jur kiba dang bteng ban leit sha Iran. Ka sorkar Iran kam ithuh ïa ka jinglong trai ri arliang mamla bad ka ju kyntait ïa ki jingshakri jong ki nongïalam sha ki nongshong shnong jong ka US kiba la shah set.
Katei ka jingkren jong ka tnat kam pohïing jong ka US, ka ka long hadien ka jingïakynad kaba dang shen hapdeng ka Israel bad ka Iran bad ka jinghiar thma jong ka US ïa ki shlem nuclear jong ka Iran bad ki ktem shipai jong ka.
Ha kaba sdang jong kane ka taïew ba la dep, U President jong ka US, u Donald Trump, u la pynpaw ïa ka jingkyrmen ban wanrah noh ia ka jingiasuk kaba pura bad ka Iran bad u la ong ba ka Iran ruh ka kwah ban wanrah ia ka shongsuk- shongsaiñ ha baroh arliang ri bad ha ka pyrthei baroh kawei.
