Mih da ki hajar ki khun ka Seiñraij ban sakhi ïa ka jingrah Khnong Blai

Jowai, Naitung 13

Da ki hajar ngut ki khun ka Seiñraij ha ka 13 tarik Naitung ki la ïa mih paidbah ban sakhi ïa ka jingrah Khnong Blai ban leit buh sha ka jaka kyntang ha Pohsawiar.

Ha kane ka jinglehniam la ïohsngew ïa ka jingriew jong ki bom ki ksing bad ki tangburi ryngkat ka shad risa bad ka kynhoi kynkiw artad.

Ki kynthei longkmie bad ki samla kynthei ha la ki riam ki jingdeng ksiar ki la ïa mih madan ban peit kai ïa ka jingshad ki ‘rang samla, ki rangbah kiba la ïa shim bynta ban rah ïa ka Khnong Blai ha shwa ban pyndep ïa ka niam kaba kongsan.

Ka Sngi U Blei ka la dei ka sngi kaba lai jong ka lehniam Behdieñklam, ha kaba la pyndep ïa ki lehniam bapher-bapher kaba la sdang naduh ka por 4 baje mynstep da kaba pynïeng ïa ka Dieñkhlam ka Bon ha ïung Blai jong ki jait Rangad ha Chilliangraij Jowai.

Ha kane ka juh ka por la pynïeng ruh ïa ka Dieñkhlam ka Doh bad hadien kane pat ki thliew ïing ka Niamtre ki la pynïeng ïa ki Dieñkhlam rit ha la ki iïng ki iïng jong ki.

Ki khon ka Seiñraij ki la leit shaw ïa ka Symbud Khnong na jaka kyntang na Ïawmusiang ban pynïeng ïa ka ha Khliehshnong ha dong Chilliangraij.

La pyndep ruh ïa ka jingshad ha ki jaka niam kynthup na madan ka Biar Blai, Datlawakor bad ha kiwei kiwei ki jaka niam ha Ïawmusiang.

Ha ryngkat ki bom ki ksing bad ki tangburi, la leit sha Loomsooïung ban leit rah ïa ka Khnong Blai bad leit buh ïa ka ha ka jaka kyntang ha Pohsawiar.

Hangne ha Pohsawiar, u Dolloi ka Elaka ha ryngkat ka nguh ka dem u la aiti ïa u khnong ha u Kñi ka kur Nikhla ban pyndep ïa ka niam ka rukom bad hadien ba la pyndep ïa ka niam, la rah ïa ka Khnong Blai sha madan Moosyiem ka ban pyndep pat da u Kñi ka kur Nikhla bad u Pator.

Kane ka lehniam Behdieñkhlam jong ka Seiñraij Jowai kan kut lashai ka sngi 14 tarik Naitung ha Aitnar.